މިހާރު ކުރިޔަށްދާ ރައްޔިތުންގެ މަޖިލީހުގެ ދައުރު، މިހިނގާ ޑިސެމްބަރު މަހުގެ 18 އާ ހަމައަށް އިތުރުކުރުމަށް، ނިންމައިފިއެވެ.

މިހާރު ކުރިޔަށްދާ ރައްޔިތުންގެ މަޖިލީހުގެ ޖަލްސާގައި މަޖިލީހުގެ ދައުރު އިތުރުކުރުމަށް ހުށައެޅުއްވީ ރައްޔިތުންގެ މަޖިލީހުގެ ރައީސް މުހައްމަދު އަސްލަމްއެވެ. އަސްލަމް ވިދާޅުވީ އެ ހުށައެޅުއްވުމާއި މެދު މެމްބަރުންނަށް ފެނިވަޑައިގަންނަވާ ގޮތެއް ބެއްލެވުމަށް މިއަދު މެންދުރުފަހު މަޖިލީހުގައި ވޯޓަށް އައްސަވާނެ ކަމަށެވެ.

މަޖިލީހުގެ ޤަވާއިފިގައި ބަޔާންކޮށް އަދި ދައުރުތައް ބަހާފައި އޮންނަ ގޮތުން ރައްޔިތުންގެ މަޖިލީހުގެ އަހަރުގެ 3 ވަނަ ދައުރު ނިމޭނީ ނޮވެމްބަރު މަހުގެ 27 ވަނަ ދުވަހުގައެވެ. އެހެން ނަމަވެސް އެދުވަހުވެސް މަޖިލީހުގެ ރިޔާސަތުން ހުށައަޅުއްވައިގެން މަޖިލީހުގެ ދައުރު މާދަމާއާ ހަމައަށް ކުރިޔަށް ގެންދިޔުމަށް ފާސްކުރެއްވިއެވެ.

މިއަދު އަނެއްކާވެސް ދެވަނަ ފަހަރަށް މަޖިލީހުގެ ދައުރު އިތުރުކުރިމަށް ރިޔާސަތުން ހުށައެޅުއްވީ މަޖިލީހުން ކޮންމެހެން ނިންމަންޖެހޭ މަސައްކަތްތަކެއް ނުނިމި ހުރުމާއި ގުޅިގެންނެވެ. 

މަޖިލީހުގެ ރައީސް އަސްލަމް ވިދާޅުވީ މަޖިލީހުގެ ދައުރު އިތުރުކުރެއްވުމަށް ހުށައެޅުއްވީ، މަޖިލީހުގެ ގަވާއިދުގެ 214 ވަނަ މާއްދާގެ ހ. ގެ ދަށުން ބަޖެޓު ކޮމިޓީގެ މަސައްކަތް ނިންމާ ހިނގަމުންދާ މަޖިލީހުގެ ދައުރު ނިންމުމުގެ 7 ދުވަސް ކުރިން ބަޖެޓާ މެދު ގޮތެއް ނިންމުމަށް ހުށަހެޅުމަށް އޮންނާތީކަމަށެވެ.

ރައްޔިތުންގެ މަޖިލީހުގެ މިއަހަރުގެ ދައުރު ނިންމާލެވޭނީ އަންނަ އަހަރަށް ލަފާކުރާ ދައުލަތުގެ ބަޖެޓް ފާސްކުރެއްވުމަށްފަހުގައެވެ.