ސްޓޭޓް މިނިސްޓަރުކަން ދިނުމަށްފަހު ދެތިން ދުވަސްތެރޭގައި މަޤާމުން ވަކިކުރި މީހުންނަކީ އިދާރީ އޮޅުމެއްގެ ސަބަބުން މަޤާމުތަކަށް ޢައްޔަނުކުރެވުނު މީހުންކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

ނޫސްވެރިންނަށް މައުލޫމާތު ދިނުމަށް އަންގާރަދުވަހު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އައްޔަނުކުރިތާ ކުޑަދުވަސްކޮޅެއްގެ ތެރޭގައި ބައެއް މީހުން މަޤާމުން ވަކިކުރެއްވީ، މަޤާމުތަކަށް ޢައްޔަނުކުރުމައި އިދާރީގޮތުން ބަލަންޖެހޭ ކަންކަން ނުބެލި ދިޔުމުން ކަމަށެވެ.

މިސަރުކާރުން މަޤާމުތަކަށް ޢައްޔަނުކުރި 3 މީހަކު ވަނީ ދެތިން ދުވަހުގެ ތެރޭގައި މަޤާމުން ވަކިކޮށްފައެވެ. އޭގެ ތެރޭގައި ހިމެނެނީ، ޓޫރިޒަމް މިނިސްޓްރީގެ ސްޓޭޓް މިިނިސްޓަރަކަށް އައްޔަނުކުރި މުންއިމް އަނީސް އާއި، ފޮރިން މިނިސްޓްރީގެ ސްޓޭޓް މިނިސްޓަރަށް އައްޔަނުކުރި ފަހުމީ ހަސަން އާއި، ޕީސީބީގެ މެމްބަރުކަމަށް ޢައްޔަނުކުރި ޙަސަން މުޣުނީއެވެ.

Advertisement

ސްޓޭޓް މިިނިސްޓަރަކަށް އައްޔަނުކުރި މުންއިމް މަޤާމުން ވަކިކުރީ އޭނާއަކީ ވާދަވެރި ކެންޑިޑޭޓަށް ކެމްޕޭނުކުރި މީހަކަށްވާތީ ކަމަށް މައުލޫމާތު ލިބިފައެވެ. ފޮރިން މިނިސްޓްރީގެ ސްޓޭޓް މިނިސްޓަރަށް އައްޔަނުކުރި ފަހުމީ ހަސަންއަކީ އޭނާ ސިވިލްސަރވިސސް ކޮމިޝަންގެ ރައީސްގެ މަޤާމުގައި ހުރި އިރު އެތަނުގެ މުވައްޒަފަަކަށް ޖިންސީ ގޯނާކުރި ކަމުގެ ތުހުމަތު ކުރެވި ދައުވާ ކުރެވުނު މީހެކެވެ. އޭނާ މަޤާމުން ވަކިކުރީވެސް އާއްމުންގެ ފާޑުކިޔުންތައް ސަރުކާރަށް އަމާޒުުވެފައި ވަނިކޮށެވެ.

މީގެ އިތުރުން ޕީބީސީއަށް އައްޔަނުކުރެއްވި ޙަސަން މުޣުނީ މެމްބަރުކަމުން ވަކިކުރެއްވީ، ޤާނޫނުގައި ބުނާ 7 މެމްބަރުން ހަމަވެފައި ވަނިކޮށް އޭނާ ޕީބީސީގެ ބޯޑަށް ޢައްޔަނުކުރެވެމުންނެވެ.