ޕާކިސްތާނުގެ ކުރީގެ އިމްރާން ޚާންގެ ގެ ބަލައި ފާސްކުރާނެ ކަމަށް ފުލުހުން ހާމަކުރުމާއިއެކު ލާހޯރުގައި ނުތަނަވަސްކަން ބޮޑުވެއްޖެއެވެ.

މުރާސިލުން ހާމަކުރާ ގޮތުގައި ނިއުކުލިއަރ ބާރެއްގެ ގޮތުގައި އޮތް ޕާކިސްތާނުގައި އިތުރަށް ހަމަނުޖެހުންތައް ބޮޑުވެގެން ހިނގައިދާނެ ކަމުގައި ވަނީ ބެލެވިފައެވެ.

ޕަންޖާބު ޕްރޮވިންސްގެ އިންފޮމޭޝަން މިނިސްޓަރު އާމިރު މީރު ހުކުރު ދުވަހު އަލްޖަޒީރާއަށް ވިދާޅުވީ ޕްރޮވިންސްގެ ވެރިރަށް ލާހޯރުގެ ޒަމާން ޕާކް ސަރަހައްދުގައި ހުންނަ އިމްރާންޚާން ދިރިއުޅުއްވާ ގެކޮޅު ބަލައި ފާސްކުރުމުގެ އަމުރެއް ކޯޓުން ފުލުހުންނަށް ދީފައިވާ ކަމަށެވެ. 

ޕާކިސްތާނުގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި އިމްރާންޚާންގެ ގެކޮޅު ރެއިޑްކުރުމަށްޓަކައި މިއަދު މެންދުރު ޕަންޖާބުގެ ހަތަރު ފުުލުހަކު އެގެކޮޅަށް ދިޔައެވެ.

އާމިރު މީރު ވިދާޅުވީ، ޚާންގެ ގެކޮޅުގައި 40 ޓެރަރިސްޓުން ފިލާ ތިބި ކަމުގެ މައުލޫމާތު ލިބިފައިވާ ކަމަށާއި އެމީހުން ފުލުހުންނާއި ހަވާލު ކުރުމަށް، 24 ގަޑިއިރުގެ މުހުލަތެއް ދީފައިވާ ކަމަށެވެ. 

ޚާން ކޯޓަށް ހާޟިރުވުމުން ޕާކިސްތާނުގެ ފުލުހުން އޭނާ ހައްޔަރުކުރުމާއި ގުޅިގެން ލާހޯރުގައި ބޮޑެތި ހަމަނުޖެހުންތަކެއް ހިނގާފައިވެއެވެ. މިގޮތުން ޚާންގެ ސަޕޯޓަރުން ވަނީ ޕާކިސްތާނު ސިފައިންގެ ފުލުހުންނާއި ސިފައިންގެ އަސްކަރީ މަރުކަޒުތަކަށް ވަދެ ހަމަލާތައްދީފައެވެ.

އެހަމަލާތަކާއި ގުޅިގެން ހޯދަމުންދާ މީހުން އިމްރާންޚާން ގެ ގެކޮޅުގައި ފިލައި ތިބިކަމަށް ޕާކިސްތާނު ފުލުހުންކުރާ ތުހުމަތުތައް އެމަނިކުފާނު ވަނީ ދޮގު ކުރައްވާފައެވެ.