ސަރުކާރުގެ ބޯހިޔާވަހިކަމުގެ ސްކީމްގެ ދަށުން ދޫކޮށްފައިވާ ހިޔާ ފްލެޓްތަކުގެ އަގު ސަރުކާރުން 3984ރ އަށް ކުޑަކޮށްފިއެވެ.

މިކަން އިއުލާނުކުރެއްވީ މިހާރު ރައީސުލްޖުމްހޫރިއްޔާގެ އޮފީހުގައި ކުރިޔަށްދާ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ، ޑރ. މުހައްމަދު މުޢިއްޒެވެ.

އެމަނިކުފާނު ވިދާޅުވީ، އެގޮތަށް ނިންމެވީ އެކަމާއި ގުޅޭ ގޮތުން މިއަދު ބޭއްވި ވަޒީރުންގެ މަޖިލީހުގައި މަޝްވަރާކުރެއްވުމަށް ފަހުގައި ކަމަށެވެ. އެގޮތަށް ހިޔާގެ އަގުތައް ކުޑަކުރެއްވީ ރިޔާސީ އިންތިޚާބުގައި، ހިޔާ ފްލެޓްތަކުގެ ފިނިޝިންގއަށް ޚަރަދުކުރި ފައިސާ ސަރުކާރުން އަނބުރާ ދެއްވުމަށް ވެވަޑައިގެންނެވި ވަޢުދު ފުއްދެވުމުގެ ގޮތުން ކަމަށެވެ.

ކުރީގެ ސަރުކާރުން ހިޔާގެ ފްލެޓްތަކުގެ އަގު ކުރިޔަށް އޮތް 7 އަހަރަށް 5300ރ އަށް އޮތީ ކުޑަކޮށްދީފައެވެ. އެގޮތުން މެއިންޓަނަންސްފީއާއެކު މިހާރު ދައްކަން ޖެހެނީ، 6300ރ އެވެ.

ސަރުކާރުން މިހާރު މިގެނައި ބަދަލުގައިވެސް ފްލެޓްތަކުގެ ކުލި 3984އަށް ކުޑަކޮށްދެއްވާފައި ވަނީ ކުރިޔަށް އޮތް 7 އަހަރަށެވެ. އެހެންކަމުން މިއާއެކު ހިޔާ ފްލެޓްތަކުގެ ކުލީގެ ގޮތުގައި، ދައްކަންޖެހޭނީ، 4984ރ އެވެ.