ބ. ފުޅަދޫން ވިޔަފާރިއާއި އިޤްތިޞާދީ ބޭނުންތަކަށް 26 ބިމެއް ދޫކުރުމަށް ހުޅުވާލައިފިއެވެ.

ފުޅަދޫ ކައުންސިލުން ވިދާޅުވީ، ރަށުގައި ހުރި އިޖުތިމާޢީ މައްސަލަތައް ޙައްލުކުރުމަށްޓަކައި، ރަށުގެ ބަނދަރާ ގުޅިގެން ބަނދަރުގެ އިރުން އަލަށް ހިއްކާފައިވާ ފަސްގަޑުން ވިޔަފާރީގެ އެކިއެކި ބޭނުންތަކަށް ބިން ދޫކުރުމަށް ހުޅުވާލީ ކަމަށެވެ.

ފުޅަދޫ ކައުންސިލުން ވިދާޅުވީ ބިން ދޫކުރުމަށް ނިންމާފައިވަނީ މިއަހަރުގެ ސެޕްޓެންބަރު 06 ވަނަ ދުވަހު ބޭއްވި ކައުންސިލްގެ ޢާއްމު ބައްދަލުވުމުގައިކަމަށެވެ. އެގޮތުން ބިން ދޫކުރަނީ ފައިބަރ މަސައްކަތް ކުރުމަށާއި، ގައު އެޅުމަށާއި، ވަޑާން ކުރުމަށާއި، ގުދަން އެޅުމަށާއި އަދި ލަނޑާ ކެއްކުމަށް ކަމަށް ކައުންސިލުން ވިދާޅުވެއެވެ. އެގޮތުން ފައިބަރ މަސައްކަތް ކުރުމަށް 04 ބިން، ގައު އެޅުމުގެ މަސައްކަތް ކުރުމަށް 03 ބިން، ވަޑާން ކުރުމުގެ މަސައްކަތައް 03 ބިން، ގުދަން އެޅުމުގެ މަސައްކަތައް 09 ބިން އަދި ލަނޑާ ކެއްކުމުގެ މަސައްކަތައް 07 ބިން ދޫކުރުމަށް ނިންމާފައިވާކަމަށެވެ.

މިބިންތަކަށް ހުށަހެޅޭނެ އެންމެ ކުޑަކުއްޔަކީ މަހަކު އަކަފޫޓަކަށް 60 ލާރިކަމަށާއި، ބިން ކުއްޔަށް ދެވޭނީ، ހުށަހެޅޭ ބީލަންތައް އިވެލުއޭޓް ކުރުމަށްފަހު އެންމެ މަތީ އަގު ހުށަހަޅާ ފަރާތްތަކަށް ކަމަށް ކައުންސިލުން ވިދާޅުވެއެވެ.މިބިންތައް ކުއްޔަށް ނަގަން ޝައުޤުވެރިވާ، ފުޅަދޫގެ ރައްޔިތުން މަޢުލޫމާތު ސާފުކުރުމަށް ފަހު އަންދާސީ ހިސާބު ހުށަހެޅުމަށް ކައުންސިލުން ވަނީ ހުޅުވާލާފައެވެ.