ޢަރަބި ސަމިޓްގައި ބައިވެރިވެވަޑައިގެންނެވުމަށް ސީރިއާގެ ރައީސް ބައްޝާރުލް އަސަދު ސަޢޫދީޢަރަބިއްޔާއަށް ވަޑައިގެންފިއެވެ.

މިއީ 2011 ވަނަ އަހަރު ސީރިއާގެ ދާޚިލީ ހަނގުރާމަ ފެށުނުފަހު ބައްޝާރު ސަޢޫދީއަށް ކުރައްވާ ފުރަތަމަ ދަތުރުފުޅެވެ. 

އަސަދުގެ ސަރުކާރުން ސީރިއާގެ އާއްމުންނާއި ދެކޮލަށް ދެމުންދިޔަ ހަމަލާތަކުގެ ސަބަބުން ސީރިއާ ޢަރަބި ލީގުން ބޭރުކުރުމަށްފަހު އަލުން ޢަރަބި ލީގުގައި ބައިވެރިކޮށްފައި ވަނީ މިއަހަރުގައެވެ. އަދި އަރަބި ލީގުގެ ސަމިޓްގައި ބައިވެރިވެވަައިގެންނެވުމަށް ސަޢޫދީއަށް ވަޑައިގެންނެވުމަށް ބައްޝާރަށް ދަޢުވަތު ފޮނުއްވީ ސަޢޫދީ ރަސްގެފާނު ސަލްމާން ބިން ޢަބުދުލްޢަޒީޒެވެ.

ބައްޝާރުލް އަސަދު އިއްޔެ ސަޢޫދީ އަރަބިއްޔާއަށް ވަޑައިގެންނެވުމުން، ކިންގް ޢަބުދުލްޢަޒީޒް އެއަރޕޯޓުން އޭނާއަށް މަރުޙަބާދެންނެވީ، މައްކާގެ ޑެޕިއުޓީ ގަވަރުނަރު ޢަމީދު ބަދުރް ބިން ސުލްޠާނެވެ.

ސީރިއާ ސަރުކާރުން ހާމަކޮށްފައިވާ ގޮތުގައި ޢަރަބި ލީގުގެ ސަމިޓްގެ ހަވާސާގައި، ސީރިއާގެ ރައީސް ބައްޝާރުލް އަސަދު، ޤައުމުތަކުގެ އިސްވެރިންނާއި ބައްދަލު ކުރައްވާނެއެވެ.

ސީރިއާގެ ދާޚިލީ ހަނގުރާމައިިގައި އަސަދުގެ ސިފައިން ވަނީ އާއްމުންނާއި ދެކޮޅަށް ހަނގުރާމައި ޖަރީމާތަކާއި ޤަޠުލު އާއްމުތައް ހިންގާފައެވެ. އަދި ސީރިއާގެ ސިފައިންގެ ތެރެއިން ވަކިވެގަނެ ސަރުކާރާއި ދެކޮޅަށް ހަނގުރާމަކުރަންފެށި މުޖާހިދުންނާއި ދެކޮޅަށްވެސް ސީރިއާ ސަރުކާރު ސިފައިންނާއި ރަޝިޔާ ސިފައިން ވަރުގަދަ ހަމަލާތަކެއް ދީފައިވެއެވެ.

12 އަހަރުވީ ދާޚިލީ ހަނގުރާމައިގެ ސަބަބުން ސީރިއާގެ އުތުުރުގެ މައި ސިޓީތައް ކަމުގައިވާ، އިދުލީބާ، ހަލަބް، ހާމާ އަދި ހޮމްސް ފަދަ ސިޓީތައް ވަނީ މުޅިން ފުނޑުފުނޑުވެފައެވެ. އަދިވެސް ސީރިއާގެ އުތުރުގެ ސިޓީތަކުގެ ބޮޑުބައެއް ކޮންޓްރޯލް ކުރަމުންދަނީ މުޖާހިދުންނާއި ހަނގުރާމަވެރި އެހެން ގުރޫޕްތަކުންނެވެ.