އިޓްލޮސްގެ ނިންމުމާއި ގުޅިގެން ރާއްޖޭގެ ދެކުނު ސަރަހައްދުން ރާއްޖެއަށް ގެއްލުނު ކަނޑުގެ ސަރަހައްދު އަނބުރާ ހޯދުމުގެ މަސައްކަތް އަވަސް ކުރުމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ގޮވާލައްވައިފިއެވެ.

ޤާސިމް އިބްރާހީމަކީ، އިޓްލޮސްގެ ނިންމުމާއި އެކު ރާއްޖޭގެ ކަނޑުގެ ސަރަހައްދުން ބައެއް ދިވެހި ސަރުކާރުން ދޫކޮށްލެއްވީ ކަމަށް ވިދާޅުވެ ވާހަކަފުޅު ދެއްކެވި ސިޔާސީ ލީޑަރުންގެ ތެރޭގައި ހިމެނޭ ބޭފުޅެކެވެ. ޗާގޯސްގެ އަތޮޅުތަކާއި އައްޑޫ ސިޓީއާ ދެމެދުން ރާއްޖެއާ މޮރިޝަސްއާ ދެމެދު އޮތް ކަނޑުގެ ސަރަހައްދު ބަހަން ޖެހުނީ، ޗާގޯސްގެ ޖަޒީރާތަކުގެ ސިޔާދަތީ ބާރު ލިބިގެންވަނީ، މޮރިޝަސްއަށް ކަމުގައި އިންޓަރނޭޝަނަލް ކޯޓު އޮފް ޖަސްޓިސް އައިސީޖޭއިން ކަނޑައެޅުމާއި ގުޅިގެން، ކަނޑުގެ ސަރަހައްދު ބެހުމުގެ މައްސަލަ މޮރިޝަސްއިން އިޓްލޮސްއަށް ހުށައެޅުމުންނެވެ.

ޤާސިމް އެކްސްގައި ލިޔުއްވި ޕޯސްޓުގައި، އިނގިރޭސި ދައުލަތުން ޗާގޮސް އެކިޕެލާގޯ، މޮރިޝަސް އާއި ހަވާލު ކުރުމަށް ކުރިން ނިންމި ނިންމުން ބަދަލު ކުރިކަން އެ ޤައުމުގެ ނޫސްތަކުގައި ރިޕޯޓް ކޮށްފައިވާ މި ދަނޑިވަޅުގައި، އިޓްލޮސް ގެ ނިންމުމާއި އެކު ރާއްޖެއާއި ޗާގޮސްގެ މައްސަލައިގައި ދިވެހީންނަށް ގެއްލިފައިވާ ސަރަހައްދު ހޯއްދަވައިދެއްވުމަށް ވިސްނުންތެރިކަމާއެކު ވީހާވެސް ހަލުވިކޮށް މަސައްކަތްޕުޅު ފެއްޓެވުމަށް ވަނީ އެދި ވަޑައިގެންފައެވެ.

އަދި ވެރިކަން ލިބިވަޑައިގެންފިނަމަ ސަރުކާރުގެ ފުރަތަމަ 100 ދުވަހުގެ ތެރޭގައި އެ މައްސަލަ އިސްތިއުނާފަށް ވައްދާނެކަން ރައީސް ޑރ. މުޢިއްޒު ވަޢުދުވެވަޑައިގެންފައިވާކަންވެސް ޤާސިމް ވަނީ ފާހަގަ ކުރައްވާފައެވެ. ޤާސިމް އިތުރަށް ވިދާޅުވީ، އެ މައްސަލަ އަކީ އެމަނިކުފާނުވެސް ފާއިތުވި ރިޔާސީ އިންތިޚާބުގައި ހައްލުހޯދުމުގެ ޢަޒުމުގައި ނުހަނު ބޮޑަށް ވަކާލާތު ކުރި ޤައުމީ މައްސަލައެއް ކަމަށެވެ. އަދި އެކަމުގައި އިނގިރޭސި ދައުލަތުން ފަހުން ނިންމާފައި މިވާ ނިންމުމުގެ ސަބަބުން ދިވެހީން ޒަމާނުއްސުރެ މަސްވެރިކަންކުރަމުންއައި ކަނޑުގެ ސަރަޙައްދު އަލުން ދިވެހީންނަށް ފުރިހަމައަށް ލިބުމުގެ ފުރުޞަތު ބޮޑުވެފައި ވާތީ، އިނގިރޭސި ދައުލަތާއިއެކު އަވަސް މަޝްވަރާތަކެއް ފައްޓަވައި ޒަމާނުއްސުރެ ދިވެހީން ގެންގުޅެމުން އައި ސްޓޭންޑް ދަމަހައްޓަވައި ކަނޑުގެ ސަރަހައްދު އަނބުރައި ހޯއްދަވައިދެއްވުމަށް ރައީސުލްޖުމްހޫރިއްޔާގެ ހައިސިއްޔަތުން ޑރ. މުހައްމަދު މުޢިއްޒު މަސައްކަތް ކުރައްވާނޭ ކަމަށް ޔަޤީން ކުރައްވާކަމުގައިވެސް ޤާސިމް ވަނީ ވިދާޅުވެފައެވެ. މީގެ އިތުރުން އެމަސައްކަތުގައި ޤާސިމް އިބްރާހީމާއި އަދި އެމަނިކުފާނުގެ ޕާޓީ ޖުމްހޫރީ ޕާޓީން ސަރުކާރަށް ފުރިހަމައަށް އެެއްބާރުލުން ދޭނެ ކަމުގައިވެސް ޤާސިމް އިބްރާހީމް ވަނީ ވިދާޅުވެފައެވެ.