ކުރީ ސަރުކާރުން ނެރުނު ފްލެޓްލިބޭ މީހުން ލިސްޓްތައް އަލުން ބަލައި އިވެލުއޭޓްކޮށް ފްލެޓް ދެވެނީ އެންމެ ހައްޤުވެރިންނަށްކަން ކަށަވަރު ކުރައްވާނެ ކަމުގައި މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ ޢަލީ ހައިދަރު އަޙުމަދު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ގެދޮރުވެރިޔާ ސްކީމްގެ ދަށުން ފްލެޓް ލިބޭނެކަމަށް ގެޒެޓް ކުރެވިފައިވާ އެންމެހާ ފަރާތްތަކާއި އަދި ކަމުގެ މަސްލަޙަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށްއެދި ހުށަހަޅުއްވާފައިވާ ޕެޓިޝަނާ ގުޅިގެން, މަޖިލީހުގެ ޕެޓިޝަން ކޮމިޓީއަށް ހާޟިރުވެވަޑައިގެން ދެއްކެވި ވާހަކަފުޅުގައެވެ.

މިނިސްޓަރ ޑރ ޢަލީ ހައިދަރު އަޙުމަދު ވިދާޅުވީ، ގެދޮރުވެރިޔާ ސްކީމްގެ ދަށުން ފްލެޓް ދިނުމުގެ މަސައްކަތްތައް ހުއްޓާލާފައި އޮތީ، އޭސީސީގެ އެންގުމަށް ކަމަށެވެ. އެހެންވެ އޭސީސީއާ ވާހަކަ ދައްކައިގެން ފްލެޓްތައް ދޫކުރުމާއި ގުޅޭ މަސައްކަތްތައް އަލުން ފަށައިގަތުމަށް މަސައްކަތް ކުރައްވަމުން ގެންދަވާ ކަމުގައި މިނިސްޓަރ ވިދާޅުވިއެވެ.

ކުރީގެ ސަރުކާރުން ކުރިޔަށް ގެންދިޔަ ގެދޮރުވެރިކަމުގެ މަޝްރޫޢުގެ ދަށުން ވިހި ހާހަށް ވުރެ ގިނަ މީހުން ފްލެޓަށް ހުށައެޅިއެވެ. 

3 ކޮޓަރީގެ ފްލެޓް

ފޯމު ހުށައެެޅި މީހުންގެ އަދަދު:  14489

ޝަރުޠު ހަމަވި މީހުންގެ އަދަދު: 12256

ޝަރުުޠު ހަމަ ނުވާ މީހުންގެ އަދަދު: 1733

2 ކޮޓަރީގެ ފްލެޓް

ފޯމު ހުށައެެޅި މީހުންގެ އަދަދު:  6208

ޝަރުޠު ހަމަވި މީހުންގެ އަދަދު: 5378

ޝަރުުޠު ހަމަ ނުވާ މީހުންގެ އަދަދު: 830

ކުރީ ސަރުކާރުގައި ނެރުނު ފްލެޓް ލިސްޓްތައް ބާތިލްކޮށް އަލުން ފޯމްތައް އިވެލުއޭޓްކޮށް، ފްލެޓްތައް ލިބޭނެ ހައްޤުވެރިފަރާތްތައް ކަނޑައަޅުއްވާނެ ކަމުގައި، ޑރ ޢަލީ ހައިދަރު އަޙުމަދު ވިދާޅުވި އިރު، އެމަނިކުފާނު ވަނީ ފްލެޓް ބޭނުންވާ ފަރާތްތަކުގެ ވެއިޓިންގ ލިސްޓެއްވެސް އެކުލަވާލެއްވުމަށް މިހާރު ސަރުކާރުން ނިންމަވާގައިވާ ކަމުގައި ހާމަކުރައްވާފައެވެ.