އާދީއްތަ ދުވަހުގެރޭ ޖަރުމަނު ބުންޑަސްލީގާގެ އެއްވަނައިގައި އޮތް ބެޔާން ލެވަކޫސަން އާއި ބޮރޫޝިއާ ޑޯޓްމަންޑު ބައްދަލުކުރި މެޗު 1-1 އިން އެއްވަރުވި ނަމަވެސް، މި ސީޒަންގައި ލެވަކޫސަން އިން ބަލިނުވެ ދަމަހައްޓަމުން އަންނަ ރެކޯޑު ދަނީ ކުރިޔަށެވެ. މީގެ ކުރިން ކޮންމެ މެޗެއްގެ ފުރަތަމަ ހާފު ގޯލު ޖަހަމުން އައި ލެވަކޫސަންގެ ޓީމަށް، ޑޯޓްމަންޑުގެ ގޯލު ފޫއަޅުވާ ލެވުނީ މެޗުގެ 79 ވަނަ މިނެޓުގައި އެ ޓީމުގެ ވިކްޓަރ ބޮނިފޭސް ކާމިޔާބުކުރި ގޯލަކުންނެވެ. ނަމަވެސް މި މެޗު އެއްވަރުވުމުން، ޖެހިޖެހިގެން 8 މެޗުން މޮޅުވުމަށްފަހު، ލެވަކޫސަން އިން މިވަނީ ފުރަތަމަ ފަހަރަށް މެޗަކުން އެއްވަރުވެފައެވެ.

މެޗުން މޮޅުނުވި ނަމަވެސް، ލެވަކޫސަން އޮތީ ޓޭބަލްގެ އެއްވަނައިގައެވެ. އެއީ 13 މެޗުން ޖުމްލަ 35 ޕޮއިންޓު ހޯދައިގެނެވެ. ދެވަނައިގައި އޮތީ ލެވަކޫސަންއަށް ވުރެން އެއް މެޗު މަދުންކުޅެ، 32 ޕޮއިންޓާއެކު ބެޔާން މިއުނިކްއެވެ. މި ހަފްތާ ޔޫނިއަން ބާލިންއާ ދެކޮޅަށް ބެޔާން ކުޅެން ހަމަޖެހިފައިއޮތް މެޗު ސްނޯ ބޭފުމުގެ ސަބަބުން ވަނީ ފަސްކޮށްފައެވެ. 

މެޗުގައި މޮޅަށް ކުޅެ ގިނަ ހަމަލާތަކެއް އުފެއްދީ ލެވަކޫސަންއެވެ. އެގޮތުން އެ ޓީމުންވަނީ ޑޯޓްމަންޑުގެ ގޯލަށް އަމާޒުކޮށް ޖުމްލަ 22 ޝޮޓު ފޮނުވާލާފައެވެ. އޭގެ ބަދަލުގައި ލެވަކޫސަންގެ ގޯލަށް ފޮނުވާލެވުނީ 6 ހަމަލާއެވެ. 

ލެވަކޫސަންއާ 10 ޕޮއިންޓު ފަހަތުން، ލީގުގެ ފަސްވަނައިގައި އޮތް ޑޯޓްމަންޑުގެ ގޯލު ކާމިޔާބުކޮށްދިނީ މެޗުގެ 5 ވަނަ މިނެޓުގައި ޖޫލިއަން ރްޔާސަންއެވެ. މިއީ މި ސީޒަންގައި އޭނާ ޖެހި 3 ވަނަ ގޯލެވެ. 

ލެވަކޫސަން އެއްވަރުކުރި ގޯލު 79 ވަނަ މިނެޓުގައި ބޮނިފޭސް ކާމިޔާބުކުރިއިރު، މި ފުރުސަތު ފަހިކޮށްދިނީ ހަމަ އެ މިނެޓުގައި ކުޅެން ނިކުތް ޗެކްރިޕަބްލިކްގެ ފޯވާޑް ޕެޓްރިކް ޝިކްއެވެ.