އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމުގެ މައްސަލަތައް ހުށައެޅޭ މިންވަރު އިތުރުވެފައިވާ ކަމުގައި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓްގެ ތަފާސް ހިސާބުތަކުން ހާމަވެއްޖެއެވެ.

އެމިނިސްޓްރީއަށް ހުށައެޅޭ މައްސަލަތަކާއި ގުޅޭ ގޮތުން ކޮންމެ މަހަކު ހާމަކުރަމުންދާ ތަފާސް ހިސާބުތަކަށް ބަލާއިރު، ސެޕްޓެމްބަރު މަހަށްވުރެ އޮކްޓޫބަރު މަހު އެއިދާރާއަށް ހުށައެޅުނު، އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމުގެ މައްސަލަތައްވަނީ %33 އިތުރުވެފައެވެ. ސެޕްޓެމްބަރު މަހުގައި އެފަދަ 14 މައްސަލައެއް ހުށައެޅުނު އިރު އޮކްޓޫބަރު މަހުގައި އެފަދަ 21 މައްސަލައެއް ހުށައެޅުނު ކަމުގައި ޖެންޑަރ މިނިސްޓްރީން ވަނީ ބުނެފައެވެ.

ރާއްޖޭގައި ނަފްސާނީ ބަލިތައް އިތުރުވަމުން އަންނައިރު، ކުޑަކުދިންގެ ތެރޭގައި ނަފްސާނީ މައްސަަލަތައް އިތުރުވުމުގެ މައްސަލަތަކާއި އަމިއްލަ ނަފުސަށް ގެއްލުންދިނުމުގެ މައްސަލަތައް އިތުރުވަމުން އަންނަ ކަމުގައި ފާހަގަކުރެވިފައިވެއެވެ. ހުސްވި އޮކްޓޫބަރު މަހުގައި، މާލެ ސަރަހައްދުގައި އުމުރުން 15 އަހަރުގެ ކުއްޖަކު މަރުވެފައިވެއެވެ. 

އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމުގެ މައްސަލަތައް އޮކްޓޫބަރު މަހު އިތުރުވި ނަމަވެސް، ސެޕްޓެމްބަރު މަހަށް ވުރެ އޮކްޓޫބަރު މަހު ހުށައެޅުނު ޖުމުލަ މައްސަލަތައް ވަނީ މަދުވެފައެވެ. މިގޮތުން، ސެޕްޓެމްބަރު މަހު އެމިނިސްޓްރީއަށް، ޖުމްލަ 213 މައްސަލަ ހުށައަޅާފައި ވާއިރު، އޮކްޓޫބަރު މަހު ޖުމްލަ 205 މައްސަލަ ވަނީ ހުށައަޅާފައެވެ.