ސްޕެނިޝް ލީގުގައި އާދިއްތަ ދުވަހުގެ ރޭ ބާސެލޯނާ އާއި އެތުލެޓިކޯ މެޑްރިޑް ބައްދަލުކުރި މެޗު 1-0 ކާމިޔާބުކޮށް، ބާސެލޯނާއިން ލީގުގެ ތިންވަނައަށް ކުރިޔަށް ޖެހިލައިފިއެވެ. މެޗުގެ ހަމައެކަނި ގޯލު ކާމިޔާބުކުރީ، ލޯނު އެއްބަސްވުމެއްގެ ދަށުން މިދިޔަ ސެޕްޓެމްބަރު މަހު އެތުލެޓިކޯ މެޑްރިޑުން ބާސެލޯނާއަށް ބަދަލުވި ޕޯޗުގަލްގެ ޖޯ ފެލިކްސްއެވެ.

މެޗުގެ 28 ވަނަ މިނެޓުގައި ލިބުނު ހަނި ފުރުސަތުގެ ބޭނުން ހިފައި، އެތުލެޓިކޯގެ ކީޕަރު ޖޭން އޮބްލެކްގެ ބޯމަތިން ބޯޅަ ގޯލުގެ ތެރެއަށް ފޮނުވާލުމަށްފަހު ބާސެލޯނާގެ ސަޕޯޓަރުންނާއެކީ އުފާ ފާޅުކުރުމަކަށް ޖޯ ފެލިކްސް ފަހަކަށް ނުޖެހުނެވެ. 

އެތުލެޓިކޯއިން ބާސާގެ ގޯލަށް ފޮނުވާލި އެންމެ ނުރައްކާތެރި ހަމަލާ ފޮނުވާލީ ކުރީގެ ބާސާގެ ކުޅުންތެރިޔާ މެމްފިސް ޑިޕޭއެވެ. ލިބުނު ހިލޭ ޖެހުމަކުން ޑިޕޭ ފޮނުވާލި ބޯޅަ ބާސާގެ ކީޕަރު މަތަކުރީ ގޯލު ދަނޑީގެ ވެސް އެހީތެރިކަމާއެކުއެވެ.

ބާސާއަށް ލީޑު ފުޅާ ކުރުމަށް އިތުރު ފުރުސަތުތަކެއް ލިބުނެވެ. ނަމަވެސް ރޮބާޓް ލެވަންޑޯސްކީއަށް މި ފުރުސަތުތަކުގެ ބޭނުން ނުހިފި، ބޭކާރުވިއެވެ.

މެޗަށް ފަހު ދިން އިންޓަވިއުއެއްގައި ޖޯ ފެލިކްސް ބުނީ، އެތުލެޓިކޯ ކޮޅަށް ކާމިޔާބު ކުރެވުނު ގޯލަކީ އޭނާއަށް ލިބުނު ވަރަށް ބޮޑު ހިންހަމަޖެހުމެއް ކަމަށާއި، ގޯލު ޖެހުމަށްފަހު އުފާ ފާޅު ކުރެވުނީ މެޗުގެ އޮއިވަރު އޮތް ގޮތުން ކަމަށެވެ. 

އެތުލެޓިކޯއާ ދެކޮޅަށް ލިބުނު 3 ޕޮއިންޓާއެކީ ބާސެލޯނާއަށް މިހާރު މިހާރު ވަނީ 15 މެޗުން 34 ޕޮއިންޓު ލިބިފައެވެ. ލީގުގެ އެއްވަނައިގައި އޮތް ރެއާލް މެޑްރިޑާއި، ދެވަނައިގައި އޮތް ޖިރޯނާއަށް ލިބިފައިވަނީ 38 ޕޮއިންޓެވެ. 

އެތުލެޓިކޯ މެޑްރިޑް މިހާރު އޮތީ 14 މެޗުން ލިބުނު 31 ޕޮއިންޓާއެކި ލީގުގެ 4 ވަނައިގައެވެ.