މޯލްޑިވްސް ބޯޓިން އެވޯޑް ހަފްލާގައި ޓޫރިޒަމް މިނިސްޓަރ، އިބްރާހިމް ފައިސަލް ދެއްކެވި ވާހަކަފުޅަށް އަމާޒުވި ފާޑުކިޔުންތަކާއި އެކު، ސަރުކާރުން މިނިސްޓަރުންގެ ވަނަވަރު އާއްމުކޮށް ޕްރޮމޯޓް ކުރަން ފަށައިފިއެވެ.

ކޮށި އިނގިރޭސި ބަހުން މިނިސްޓަރ ފައިސަލް ދެއްކެވި ވާހަކަފުޅުތަކަށް ވަރަށް ގިނަ ބަޔަކު ވަނީ، ސޯޝަލް މީޑިއާގައި މަލާމާތްކޮށް ފުރައްސާރަކޮށްފައެވެ. ފައިސަލް ދެއްކެވި ވާހަކަފުޅުގެ ވީޑިއޯއަށް ކޮމެންޓް ކުރި މީހުންވަނީ، އިބްރާހީމް ފައިސަލަކީ، ޓޫރިޒަމް މިނިސްޓަރުގެ މަޤާމު އަދާކުރެވޭ ފެންވަރުގެ ޢިލްމީ ޤާބިލްކަމެއް ނެތް ބޭފުޅެއްގެ ގޮތުގައި ފާހަގަކޮށްފައެވެ. އަދި ޓޫރިޒަމް މިނިސްޓަރުގެ މަޤާމަށް ފައިސަލް އެކަށީގެން ނުވި ނަމަވެސް އޭނާ އެމަޤާމަށް ޢައްޔަނުކުރައްވާފައިވަނީ، އޭނާގެ ބައްޕާފުޅު ޢަބުދުއްރަހީމްގެ ނުފޫޒުންކަމުގައިވެސް ފައިސަލްއަށް ފާޑުކީމީހުން ވަނީ ފާހަގަކޮށްފައެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެފައި ވަނީ އެމަނިކުފާނުގެ ކެބިނެޓަށް އައްޔަނުކުރައްވާނީ، ދިވެހި ފަޚުރުވެރިވާފަދަ ޢިލްމީ ޤާބިލް ބޭފުޅުން ކަމަށެވެ. އެހެން ނަމަވެސް ޓޫރިޒަމް މިނިސްޓަރ ފައިސަލް އިނގިރޭސިބަހުން ދެއްކެވި ވާހަކަފުޅުގެ ވައިރަލްވެ އަދި ފާޑުކިޔުންތައް އަމާޒުވެގެން ދިޔަ ވީޑިއޯއަކީ ސުކުން ޕްލޭއިން ޝާއިއުކުރި ވީޑިއޯއެކެވެ.

ޓޫރިޒަމް މިނިސްޓަރ ފައިސަލްގެ ކިބައިގައި އެފަދަ މަޤާމެއް އަދާކުރުމުގެ ޤާބިލްކަމެއް ނެތްކަމުގައިބުނެ މީހުން ފާޑު ކިޔާފައިވާއިރު، ސަރުކާރުގެ އިސް ބައެއް ބޭފުޅުންނާއި ސަރުކާރަށް ތާއީދު ކުރާ ފަރާތްތަކުންނާއި، އަދި ފަތުރުވެރިކަމުގެ ސިނާޢަތުގައި ހަރަކާތްތެރިވާ ބައެއް ފަރާތްތަކުން ވަނީ ފައިސަލްގެ ދިފާޢުގައި ވާހަކަދައްކާފައެވެ. މިގޮތުން ޓޫރިޒަމް މިނިސްޓަރަކަށް ބޭނުންވަނީ، މޮޅަށް އިނގިރޭސި ބަހުން ވާހަކަދައްކަން އެނގޭ ބޭފުލެއް ނޫންކަމާއި، ނަތީޖާ ނެރެދެވޭނެ ބޭފުޅެއްކަމުގައި އެފަރާތްތަކުން ފާހަގަކޮށްފައިވެއެވެ.

ރައިސުލްޖުމްހޫރިއްޔާގެ އޮފީހުން މިއަދު ވަނީ، ވަޒީރުންގެ މަޖިލީހަށް އައްޔަނުކުރައްވާފައިވާ ހުރިހާ ވަޒީރުންގެ ޕްރޮމޯޝަނަލް ވީޑިއޯ ކްލިޕްތައް ހަދައި ސޯޝަލްމީޑިއާގައި ދައުރުކުރަން ފަށާފައެވެ.