އދ. ދިގުރަށުގައި މަރާލާފައި ޑަސްބިން ބޭގަކަށްލައި އެއްލާފައި އޮއްވައި ފެނުނު ތުއްތުކުއްޖާގެ މަންމައަކީ ލަންކާ މީހެއް ކަމަށާއި، ވެލާނާ އެއާޕޯޓުން އޭނާ ހައްޔަރުކޮށްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އދ. ދިގުރަށުގައި ވިހެއުމަށްފަހު ކޮތަޅަކަށް ލައި އެއްލާލާފައި އޮތް ތުއްތު ކުއްޖަކު އެރަށު ކުނިގޮނޑުން ފެނިފައިވާކަމުގެ މަޢުލޫމާތު ފުލުހުންނަށް ރިޕޯޓްކޮށްފައި ވަނީ، މިއަދު ހެނދު 09:20 އެހާކަންހާއިރު ކަމަށެވެ. އަދި އެމައްސަލައާ ގުޅިގެން ފުލުހުންގެ ޓީމެއް އެރަށުގައި ހަރަކާތްތެރިވެފައިވާ ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ފުލުހުން ވިދާޅުވީ، ވިހެއި ކުއްޖާ މަރާލާ އެއްލާލި މީހާއަކީ، ސްރީލަންކާގެ އަންހެނެއް ކަމަށާއި، އޭނާ މިއަދު ހައްޔަރުކޮށްފައި ވަނީ، ވެލާނާ އެއާޕޯޓުގައި ފުރަންގޮސް ހުއްޓައި ކަމަށެވެ. އުމުރުން 30 އަހަރުގެ އެއަންހެންމީހާ ހައްޔަރުކޮށްފައި ވަނީ، ކޯޓުއަމުރެއްގެ ދަށުން ކަމުގައިވެސް އެރަށުން ފުލުހުން ވަނީ ވިދާޅުވެފައެވެ.

ވިހާފައި ދަރިފުޅު މަރާލުމުގެ ތުހުމަތުގައި ހައްޔަރުކުރި މިއަންހެންމީހާއަކީ، އދ. ދިގުރަށު ގެސްޓް ހައުސްއެއްގައި ވަޒީފާއަދާކުރަމުން ދިޔަ މީހެކެވެ. އޭނާ ވިހާފައި ވަނީ ރޭގައި ކަމަށް މައުލޫމާތު ލިބިފައިވެއެވެ.