ކުރީ އަހަރުތަކާއި ނުބައްދަލު މިންވަރަށް މި ފަސްއަހަރުގެ ތެރޭގައި މިސަރުކާރުން ވަނީ މިފްކޯގެ ކެޕޭސިޓީ ވަނީ އިތުރުކޮށްފައި ކަމުގައި ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

ފިނޭންސް މިނިސްޓަރ އަމީރު މިހެން ވިދާޅުވީ މިފްކޯއަށް މަސްކިރުވުމަށްޓަކައި މިދިޔަމަހު ރާއްޖެ ގެނައި ބޯޓު ޖަޒީރާ 3 އަށް މަސްގަންނަން ފެށުމަށް ޓަކައި ބުރާސްފަތި ދުވަހު ގދ. ފަރެސްމާތޮޑާގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ފިނޭންސް މިނިސްޓަރ އިބްރާހިމް އަމީރު ވިދާޅުވީ، މިސަރުކާރު އައިފަހުން މިހާތަނަށް ކުރެވެނު މަސައްކަތްތަކުގައި މަސްވެރިކަމުގެ ސިނާޢަތަށް އިންޤިލާބީ ބަދަލުތަކެއް ގެނެވިފައިވާ ކަމަށެވެ.

Advertisement

މިގޮތުން އަމީރު ވިދާޅުވީ، މި ފަސް އަހަރުގެ ތެރޭގައި މިފްކޯގެ މަސް ގަތުމުގެ ކެޕޭސިޓީ އިތުރުވީ އޭގެ ކުރީގެ ހުރިހާ އަހަރުތަކުގައި ކެޕޭސިޓީ އުފެއްދުނު މިންވަރާ ނުބައްދަލު މިންވަރަކަށް ކަމަށެވެ. އަދި 2018ވަނަ އަހަރު ނިމުނުއިރު ހުރި ކެޕޭސިޓީއާ އަޅާބަލާއިރު، މިހާރު ގާތްގަނޑަކަށް 241 ޕަސެންޓް ކެޕޭސިޓީއަށް އިތުރުކުރެވިފައިވާކަން އަމީރު ފާހަގަކުރެއްވިއެވެ.

2018 ވަނަ އަހަރު ނިމުނުއިރު މިފްކޯގެ އުޅަނދުތަކުގައި މަސް ގަނޑުކުރެވޭ ކެޕޭސިޓީއަކީ 80 މެޓްރިކް ޓަނެވެ. އިއްޔެ ޚިދުމަތަށް ނެރުނު ޖަޒީރާ 3 އާއިއެކު މިފްކޯގެ އުޅަނދުތަކުގައި މަސް ގަނޑުކުރެވޭ ކެޕޭސިޓީވަނީ 290 މެޓްރިކްޓަނަށް މަތިކުރެވިފައެވެ. އަދި އަލަށް ގެނައުމަށް ހަމަޖެހިފައިވާ ތިން ބޯޓު ގެނެވުމާއި އެކު އެއަދަދު 500 މެޓްރިކްޓަނަށް މަތިވާނެކަންވެސް ފިނޭންސް މިނިސްޓަރ އަމީރުގެ ވާހަކަފުޅުގައި ފާހަގަކުރެއްވިއެވެ.

ނިމިގެން ދިޔަ 2022 ވަނަ އަހަރަކީ، މިފްކޯއިން މަސްވެރިންގެ އަތުން އެންމެ ގިނައިން މަސްގަނެ އަދި މަސްވެރިންނަށް އެންމެ ގިނަ ފައިސާވެސް ދޫކުރި އަހަރެވެ. ނިމިދިޔަ އަހަރު މިފްކޯއިން މަސްވެރިން ކިރުވި މަހަށް ބިލިޔަނަކަށްވުރެ ގިނަ ރުފިޔާ ވަނީ ދޫކޮށްފައެވެ.