ރައްޔިތުންގެ މަޖިލީހުގެ ނައިބު ރައީސްގެ މަޤާމަށް އެމްޑީޕީން ވާދަކުރާނެ މެމްބަރަކަށް ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަޙުމަދު ސަލީމް ހޮވައިފިއެވެ.

އަހްމަދު ސަލީމް މިމަޤާމަށް ހޮވާފައިވަނީ، އެޕާޓީގެ ޕާލަމެންޓްރީ ގްރޫޕްގެ މެމްބަރުންގެ މެދުގައި ސިއްރުވޯޓެއްލައިގެންނެވެ.

މިއަދު ހަވީރު ކުރިޔަށް ގެންދިޔަ ޕީޖީގުރޫޕްގެ ބައްދަލުވުމުގައި ނެގި މިވޯޓު އަޙްމަދު ސަލީމް ކާމިޔާބު ކުރެއްވީ، 26 ވޯޓު ހޯއްދަވައިގެންނެވެ. އޭނާ އާއި އެންމެ ގާތުން ވާދަކުރެއްވި އައްޑޫ މީދޫ ދާއިރާގެ މެމްބަރު ރޮޒައިނާ އާދަމްއަށް ލިބިވަޑައިގަތީ 23 ވޯޓެވެ. އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ޢަބުދުﷲ ޖާބިރަށް ލިބިވަޑައިގަތީ، 4 ވޯޓެވެ. އަދި ދެވޯޓު ބާޠިލްވި އިރު، މިވޯޓުގައި އެމްޑީޕީގެ ޕާލަމެންޓްރޫ ގުރޫޕުގެ 54 މެމްބަރުން ބައިވެރިވެވަޑައިގެންނެވިއެވެ.

ރައްޔިތުންގެ މަޖިލީހުގެ ނައިބު ރައީސްގެ މަޤާމަށް މެމްބަރަކު ހޮވުމަށް ބާއްވާ ޖަލްސާ އޮންނާނީ މިރޭ، 8:30ގައި ރައްޔިތުންގެ މަޖިލީހުގެ ޖަލްސާކުރާ ގޭގައެވެ.

ރައްޔިތުންގެ މަޖިލީހުގެ ނައިބު ރައީސްގެ މަޤާމަށް އެމްޑީޕީގެ ފަރާތުން ވާދަކުރާނެ މެމްބަރަކަށް އަހުމަދު ސަލީމް ހޮވިވަޑައިގެންނެވި އިރު، މިރޭ އޮންނަ ވޯޓުގައި އެމްޑީޕީގެ ހުރިހާ މެމްބަރުން ސަލީމްއަށް ވޯޓު ދިނުމަށް ވަނީ ވިޕެއް ނެރޭނެއެވެ. މަޖިލީހުގައި އެމްޑީޕީގެ ސާފު އަޣުލަބިއްޔަތު އޮތުމާއިއެކު، ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމަށް އަޙްމަދު ސަލީމް ހޮވިވަޑައިގަންނަވާނެކަމަށް ވަރަށް ބޮޑަށް ޔަޤީންކުރެވެއެވެ.