ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމުން އީވާ ޢަބުދުﷲ އިސްތިއުފާ ދެއްވުމާއި އެކު އެމަޤާމަށް އައު މެމްބަރަކު އިންތިޚާބުކުރުމަށް ހުޅުވާލުމުން މަޖިލީހުގެ އެމްޑީޕީގެ ތިން މެމްބަރަކުން ޝައުޤުވެރިކަން ފާޅުކުރައްވައިފިއެވެ.

ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމަށް ވާދަކުރުމަށް ކުރިމަތިލެއްވި އެމްޑީޕީގެ ކެންޑިޑޭޓުންނަކީ، ރައްޔިތުންގެ މަޖިލީހުގެ އަައްޑޫ މީދޫ ދާއިރާގެ މެމްބަރު ރޮޒައިނާ އާދަމާއި، ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ޢަބުދުﷲ ޖާބިރާއި، ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަޙްމަދު ސަލީމެވެ.

އެމްޑީޕީން މައުލޫމާތު ދީފައިވާ ގޮތުގައި ނައިބު ރައީސް ކަމުގެ މަޤާމަށް އެމްޑީޕީގެ ފަރާތުން ވާދަކުރާނެ މެމްބަރަކު ހޮވުމަށް ޕާޓީގެ ޕާލަމެންޓްރީ ގްރޫޕުގައި ވޯޓު ނެގުން މިއަދު ހަވީރު ހަތަރެއް ޖަހާއިރު އޮންނާނެއެވެ. ޕާޓީގެ ޕާލަމެންޓްރީ ގުރޫޕުން ހޮވޭބޭފުޅަކު މަޖިލީހުގެ ނައިބު ރައީސްގެ މަޤާމަށް ހޮވުމަށް އެމްޑީޕީން ތްރީލައިންވިޕް އަޅާނެއެެވެ.

ރައްޔިތުންގެ މަޖިލީހުގެ މެޖޯރިޓީޕާޓީއަކީ، އެމްޑީޕީ ކަމުގައި ވާތީ އެމްޑީޕީގެ ޕާލަމެންޓްރީ ގުރޫޕުގައި ނެގޭވޯޓުން މަޖިލީހުގެ ނައިބުރައީސް ކަމުގެ މަޤާމަށް ވާދަކުރުމަށް ހޮވޭ ބޭފުޅަކަށް، އެމަޤާމު ކާމިޔާބު ކުރެއްވޭނެ ކަމުގެ ޔަޤީންކަން އޮންނާނެއެވެ.

ރައްޔިތުންގެ މަޖިލީހުގެ އިދާރާއިން ވަނީ، މަޖިލީހުގެ ނައިބު ރައީސް ހޮވުމަށް ބާއްވާ ޖަލްސާ މިރޭގެ، 8:30ގައި ބޭއްވުމަށް މިހާރު އެޖެންޑާކޮށްފައެވެ.