ރައްޔިތުންގެ މަޖިލީހުގެ ނައިބު ރައީސްކަމުގެ މަޤާމުން އީވާ އަބްދުﷲ އިސްތިއުފާ ދެއްވައިފިއެވެ.

އީވާ މަގާމުން އިސްތިއުފާ ދެއްވީ މިއަދުއޮތް ރައްޔިތުންގެ މަޖިލީހުގެ ޖަލްސާއަށް އިތުރުބާރު ނެތްކަމަށް ހުށައަޅައިފައިވަނިކޮށެވެ. މިއަދުގެ ޖަލްސާ ފެށިގެން އީވާއަށްވަނީ ޖަވާބުދާރީވުމަށްވެސް ފުރުސަތު އަރުވާފައެވެ.

އޭނާ އިސްތިއުފާދެއްވީ ޖަވާބުދާރީވެވަޑައިގަތުމުގެގޮތުން މަޖިލީހުގެ ތަޅުމުގައި ވާހަކަފުޅު ދެއްކެވުމަށްފަހުއެވެ. ގާތްގަނޑަކަށް 30 މިނެޓު ވަންދެން އީވާ ދެއްކެވި ވާހަކައިގައި ވަނީ އޭނާ ވަކިކުރަން އެމްޑީޕީން ހުށަހެޅި ގަރާރުގައި ހުރި ވަކިވަކި ކަންކަމަށް ޖަވާބު ދެއްވައި ނައިބު ރައީސްގެ މަގާމުގައި ހުންނަވައިގެން ކުރެއްވި ކަންކަމާއި ދުވަހަކު ވެސް ނުކުރައްވާނެ ބައެއް ކަންކަން ވިދާޅުވެފައެވެ.

އިވާ އިސްތިއުފާދެއްވީ އޭނާ މަޤާމުން ވަކިކުރުމުގެ މައްސަލައިގެ ޖަލްސާ ހިނގަމުންދަނިކޮށް ކަމަށްވާތީ އެޖަލްސާ ކުރިއަށް ގެންދިއުމށް ބައެއް މެމްބަރުން އެދުނެވެ. އެހެންނަމަވެސް އީވާ އިސްތިއުފާދެއްވުމާ ގުޅިގެން ޖަލްސާ އިތުރަށް ކުރިއަށް ނުގެންދެވޭނެކަން އެންގުމަށްފަހު ރިޔާސަތުން ވަނީ ޖަލްސާ ނިންމަވާލައްވާފައެވެ. އަދި މަޖިލީހުގެ އައު ނައިބުރައީސް ހޮވުމަށް މިރޭ 20:30 މަޖިލީހުގެ ޖަލްސާއެއް އޮންނާނެކަމަށްވެސް ރިޔާސަތުން އެންގެވިއެވެ.