ދެގުރޫޕެއްގެ ދެމެދުގައި ހިނގި މާރާމާރީއާ ގުޅިގެން އައްޑޫ ސިޓީއާ މާލޭގައި ފިޔަވަޅުތައް ވަރުގަދަކޮށްފައިވާ ކަމުގައި ފުލުހުންގެ އިދާރާއިން ބުނެފިއެވެ.

މާލޭގައި ނޮވެމްބަރު 29 ވަނަ ދުވަހު ބޮޑު މާރާމާރީއެއް ހިނގާފައި ވާއިރު، ޑިސެމްބަރު މަހުގެ 1 ވަނަ ދުވަހުގެރޭ އައްޑޫ ސިޓީގައި ވަނީ ބޮޑު މާރާމާރީއެއް ހިންގައި، ޒުވާނަކު ވަރަށް ބޮޑަށް ޒަޚަމްކޮށްލާފައެވެ. ޒަޚަމްކޮށްލާފައިވާ ޒުވާނާގެ ހާލު ސީރިޔަސްކަމުގައި ފުލުހުން ވިދާޅުވެއެވެ.

އައްޑޫ ސިޓީ ހިތަދޫގައި މާރާމާރީ ހިންގާފައި ވަނީ ދެ ގުރޫޕެއްގެ ދެމެދުގައި ކަމަށް ވުމާއިއެކު އިތުރު ހަމަނުޖެހުންތަކެއް ހިނގިޔަ ނުދިނުމަށްޓަކައި، އައްޑޫގައި ސަލާމަތީ ފިޔަވަޅުތައް ވަރުގަދަކުރުމަށް މަސައްކަތް ފަށާފައިވާ ކަމަށާއި، މިގޮތުން އައްޑޫ ސިޓީއަށް އިތުރު ފުލުހުން ފޮނުވާނެ ކަމުގައި ފުލުހުންގެ އިދާރާއިން ވަނީ ބުނެފައެވެ.

ފުލުހުންގެ އިދާރާއިން ބުނީ މާރާމާރީތަކާއި ގުޅިގެން އަޅަންޖެހޭ ފިޔަވަޅުތައް އަޅައި، އެކަމުގައި ޝާމިލްވާ މީހުން ހޯދައި އަދި މައްސަލަތައް ތަޙްޤީޤު ކުރަމުންދާ ކަމަށެވެ.