ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށްޓަކައި، ޕްރައިމަރީ ބާއްވާއިރު ނުވަތަ ރައްޔިތުންގެ މަޖިލީހުގެ އިންތިހާބަށް ކުރިމަތިލައްވާއިރު, ކުރިމަތިލާ ކެންޑިޑޭޓްގެ ޝަރުޠުތައް ފުރިހަމަވޭތޯ ބެއްލެވުމަށް އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު އެދިވަޑައިގެންފިއެވެ.

ޙަބީބު ވަނީ، ކެންޑިޑެންސީ ހުށައެޅުގައި ދުރާލައި ބައްލަވަންވީ ކަންތައްތައް ޕާޓީތަކަށާއި، އަދި ކެންޑިޑޭޓުންގެ ގޮތުގައި ވާދަކުރައްވަން ތައްޔާރުވެވަޑައިގަންނަވާ ފަރާތްތަކަށް ހަނދުމަފުޅުކޮށްދެއްވާފައެވެ.

މިގޮތުން ރައްޔިތުންގެ މަޖިީހުގެ އިންތިޚާބަށް ކުރިމަތިލާ މީހާގެ ކިބައިގައި ފުރިހަމަވާންޖެހޭނެކަމަށް ޤާނޫނުގައި ބަޔާންކޮށްފައިވާ ޝަރުޠުތައް ޙަބީބު ވަނީ ސަމާލުކަމަށް ގެނެސްދެއްވާފައެވެ.

ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހެއްގެ ކިބައިގައި ފުރިހަމަވާންޖެހޭ އަސާސީ ޝަރުޠުތަކުގެ ތެރޭގައި:

މަޖިލީހަށް ކުރިމަތިލާ މީހެއްގައި ހުންނަންޖެހޭ ޝަރުޠުތައް:

(1) ދިވެހި ރައްޔިތަކަށްވުން.

(2) ބޭރުޤައުމެއްގެ ރައްޔިތަކަށް ނުވުން.

(3) މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކުކަމުގައިވުން.

(4) ޢުމުރުން 18 (އަށާރަ) އަހަރު ފުރިފައިވުން.

(5) ބުއްދި ހަމައަށް ހުރި މީހަކުކަމުގައިވުން.

ބޭރުޤައުމެއްގެ ރައްޔިތަކު ދިވެހި ރައްޔިތަކަށް ވެފައިވާ ނަމަ، އެ މީހަކަށް ރައްޔިތުންގެ މަޖިލީހުގެ މެންބަރުކަމަށް ކުރިމަތިލެވޭނީ، އެ މީހަކު ދިވެހި ރައްޔިތަކަށްވީތާ 5 (ފަހެއް) އަހަރު ފުރުމަށްފަހުގައެވެ. އަދި އެ މީހަކީ ދިވެހިރާއްޖޭގައި ދިރިއުޅެމުންދާ މީހެއްކަމުގައިވެސް ވާންޖެހޭނެއެވެ.

މީގެ އިތުރުން ޙަބީބު ވަނީ، ރައްޔިތުންގެ މަޖިލީހުގެ އިންތިޚާބުގައި ވާދަ ނުކުރެވޭނެ ހާލަތްތައްވެސް އާއްމުންނަށް ތަފްސީލްކޮށްދެއްވާފައެވެ.

މިގޮތުން ރައްޔިތުންގެ މަޖިލީހުގެ އިންތިޚާބުގައި ވާދަކުނުކުރެވޭނީ:

(1) އަދާކުރާންޖެހޭ ސާބިތު ދަރަންޏެއް އޮތް މީހަކު ނަމަ، ޙުކުމާ އެއްގޮތަށް އެ ދަރަނި އަދާކުރަމުން ނުދާ މީހަކު ކަމުގައިވުން.

(2) ޖިނާއީ ކުށެއް ކުރިކަން ސާބިތުވެ 12 (ބާރަ) މަސްދުވަހަށްވުރެ ދިގުމުއްދަތެއްގެ ޙުކުމެއް ތަންފީޛުކުރަމުންދާ މީހަކު ކަމުގައިވުން.

(3) ޖިނާއީ ކުށެއް ކުރިކަން ސާބިތުވެ 12 (ބާރަ) މަސްދުވަހަށްވުރެ ދިގު މުއްދަތެއްގެ ޙުކުމެއް ކުރެވިފައިވާ މީހަކު ނަމަ އެ ޙުކުމެއް ތަންފީޛުކޮށް ނިމުނުތާ، ނުވަތަ އެ ޙުކުމުން ކަނޑައެޅުނު އަދަބު މަޢާފްކުރެވުނުތާ 3 (ތިނެއް) އަހަރު ނުވާ މީހަކު ކަމުގައިވުން.

(4) ފަނޑިޔާރަކު ކަމުގައިވުން.

އަންނަ އަހަރު ރައްޔިތުންގެ މަޖިލީހުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ތައްޔާރުވަމުން ދާއިރު، އިންތިޚާބުގައި ވާދަކުރާނެ ކެންޑިޑޭޓުން ކަނޑައެޅުމަށްޓަކައި، ޕާޓީތަކުންވެސް މިހާރު ދަނީ ޕްރައިމަރީތައް ބޭއްވުމަށް ތައްޔާރު ވަމުންނެވެ.