ރައީސުލްޖުމްހޫރިއްޔާ ކުރައްވާ ރަސްމީ ދަތުރުފުޅުތަކަށް ހިނގާ ޚަރަދު ތަފްސީލްތައް ހާމަކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ކަމުގައި ރައީސުލްޖުމްހޫރިއްޔާގެ އޮފީހުން ބުނެފިއެވެ.

އެއޮފީހުން ބުނީ، ރައީސުލްޖުމްހޫރިއްޔާ ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ހިނގާ ޚަރަދުތަކުގެ މަޢުލޫމާތު ކޮންމެ ދަތުރުފުޅެއް ނިމޭތާ 15 ދުވަހުގެ ތެރޭގައި ހާމަކުރައްވާ ގޮތަށް ރައީސުލްޖުމްހޫރިއްޔާ ހަމަޖައްސަވާފައިވާ ކަމަށެވެ.

ދަތުރުތަކުގެ ޚަރަދު ތަފްސީލްތައް ހާމަކުރެއްވުމަކީ، ރައީސުލްޖުމްހޫރިއްޔާގެ މަޤާމަށް ކެމްޕޭނު ކުރެއްވިއިރު، ކުރައްވާނޭ ކަމަށް ޑރ. މުހައްމަދު މުޢިއްޒު ވިދާޅުވެފައިވާ ކަމެކެވެ. އަދި ސަރުކާރު ހިންގަވާނީ ދެފުށްފެންނަ ގޮތަށް ކަމުގައިވެސް އެމަނިކުފާނު ވަނީ ރައްޔިތުންނަށް ވަޢުދުވެވަޑައިގެންފައެވެ.

ރައީސުލްޖުމްހޫރިއްޔާ ކަމުގެ މަޤާމަށް، ޑރ. މުޙައްމަދު މުޢިއްޒު ވަޑައިގެންނެވުމަށް ފަހުގައި، ކުރެއްވި ރަސްމީ ފުރަތަމަ ދަތުރުފުޅު ކުރައްވާފައި ވަނީ، ހުސްވި ނޮވެމްބަރު މަހުގެ 26 އިން 29އަށް ތުރުކީ ވިލާތަށެވެ. ތުރުކީ ދަތުރުފުޅު ނިންމަވާލެއްވުމަށްފަހުގައި، އިސްތަންބުލްއިން އެމަނިކުވާނު ވަޑައިގެންނެވީ ދުބާއީއަށެވެ. މިހާރު އެމަނިކުފާނު ދުބާއީގައި ހުންނެވީ، ކޮޕް-28ގެ ސަމިޓްގައި ބައިވެރިވެވަޑައިގެންނެވުމަށްޓަކައެވެ.

ކުރީ ސަރުކާރުގެ ދުވަސްވަރު، ރައީސުލްޖުމްހޫރިއްޔާ ޤައުމުން ބޭރަށް ކުރައްވާ ދަތުރުފުޅުތަކުގެ ޚަރަދާއި ގުޅޭ ގޮތުން އޭރު އިދިކޮޅުގައި ތިއްބަވައިގެން، ޑރ. މުއިއްޒާއި އެމަނިކުފާނަށް ތާއީދު ކުރާ މީހުން ފާޑުކިޔަމުން ގެންގޮސްފައިވެއެވެ.