ފިކުރެއްގެ ދިރުމުގައި ބައިވެރިވެވަޑައިގެން އެމްޑީޕީގެ މެމްބަރުކަން ދޫކޮށްލެއްވި ރައްޔިތުންގެ މަޖިލީހުގެ މެމްބަރުން، ރައްޔިތުންގެ މަޖިލީހުގައި އެމްޑީޕީއަށް ލިބޭ ވަގުތުގައި ވާހަަކަ ދެއްކުމުން ހާމަވަނީ އެ މެމްބަރުންގެ ގޮތެއް ނެތްކަން ކަމުގައި، އެމްޑީޕީގެ ޗެއަރ ޕާސަން ފައްޔާޒް އިސްމާޢީލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ، އެމްޑިޕީގެ ފަރާތުން އެޕާޓީގެ އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަށް ޖަވާބު ދެއްވަމުންނެވެ.

ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި އެމްޑީޕީންވަކިވި މެމްބަރުން މަޖިލީހުގެ އެމްޑީޕީގެ ދަފްތަރުން ވަކިނުކުރާ މައްސަލައިގައި މެމްބަރުން ނުރުހުން ފާޅުކުރެއްވިއެވެ. ރައްޔިތުންގެ މަޖިލީހުގެ ރިޔާސަތުގައި އިންނަަވައިގެން، ފިކުރެއްގެ ދިރުމުގެ ނަމުގައި އެމްޑީޕީގެ ތެރޭގައި ވަކި ފެކްޝަނެއް އުފެއްދެވި، ރައީސް ނަޝީދު ވަނީ، އެމްޑީޕީއަށް މަޖިލީހުގައި ލިބޭ ވަގުތުގެ ތެރެއިން އެމްޑީޕީން ވަކިވި ފިކުރެއްގެ ދިރުމުގައި ބައިވެރިވެފައިވާ މަޖިލީހުންގެ މެމްބަރުންނަށްވެސް ވާހަކަދެއްކެވުމަށް ފުރުޞަތު ދެއްވާފައެވެ.

އެކަމާއި ގުޅޭ ގޮތުން ސުވާލު ދެންނެވުމުން ފައްޔާޒު ވިދާޅުވީ، އެއީ ވަރަށް ދެރަކޮށް ހިނގާފައިވާ ކަމެއް ކަމަށާއި، މެމްބަރުން އަމިއްލައަށްވެސް އެވަގުތުގެ ބޭނުން ނުހިފައި ދޫކޮށްލައްވަން ޖެހިވަޑައިގަންނަވާ ކަމަށް ދެކެވަޑައިގަންނަވާ ކަމަށެވެ.

ފައްޔާޒް ވިދާޅުވީ، އެމްޑީޕީން ވަކިވެވަޑައިގެންނެވުމަށްފަހުވެސް އެމެމްބަރުން އެވާހަކަދައްކަވަނީ އެމްޑީޕީގެ ވަގުތުގައި ކަމަށެވެ. އަދި ވަރަށް ބޮޑަށް ޑިމޮކްރަސީގެ ވާހަކަ ދައްކަވާ ބޭފުޅުން، އެގޮތަށް އެކަން ކުރެއްވުމަކީ ވަރަށް ދެރަކަމެއް ކަމުގައިވެސް ފައްޔާޒު ވިދާޅުވިއެވެ.

ރައްޔިތުންގެ މަޖިލީހުގައި ހިމެނޭ އެމްޑީޕީގެ މެމްބަރުންގެ ތެރެއިން 12 މެމްބަރަކު ވަނީ އެބޭފުޅުން ޕާޓީން ވަކިވެވަޑައިގެންނެވިކަން އާއްމުކޮށް އިޢުލާނު ކުރައްވައި ޕާޓީން ވަކިވުމަށް އެދި އިލެކްޝަންސް ކޮމިޝަނަށްވެސް ހުށައަޅުއްވާފައެވެ. އެހެން ނަމަވެސް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސްގެ މަޤާމުގައި ހުންނެވި މުހައްމަދު ނަޝީދު ވަނީ، މަޖިލީހުގައި އޮންނަ އެމްޑީޕީގެ ދަފްތަރުން އެމެމްބަރުންގެ ނަން އުނި ނުކުރައްވައި، މަޖިލީހުގައި އެމްޑީީޕީއަށް ލިބޭ ވަގުތުން އެ މެމްބަރުންނަށް ތަޅުމުގައި ވާހަކަ ދެއްކުމަށް ފުރުސަތު ދެއްވާފައެވެ.