މޫސުމީ ގެއްލުމަށް ބަދަލު ދިނުމަށް 'ލޮސް އެންޑް ޑެމޭޖު' ފަންޑް އެކުލަވާލުމަކީ ރާއްޖެފަދަ ކުދި ޖަޒީރާ ޤައުމުތަކަށް ލިބިގެންދިޔަ އުންމީދެއްކަމަށް އެންވަޔަރަމަންޓް މިނިސްޓަރ ޠާރިޤް އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވެފައިވަނީ ކޮޕް28 ސަމިޓްގައި ވާހަކަފުޅު ދައްކަވަމުންނެވެ.

މި ސަމިޓްގައި އެންވަޔަރަމަންޓް މިނިސްޓަރ ޠާރިޤް އިބްރާހިމް ވަނީ ކޮޕް ސަމިޓްގެ ތެރެއިން ރާއްޖޭގެ އަޑު އުފުލުމަށް ލިބުނު ފުރުސަތަށް ޝުކުރު އަދާކުރައްވާފައެވެ. މިނިސްޓަރ ވަނީ މޫސުމީ ބަދަލުތަކުން އަރައިގަތުމަށް ފަންޑެއް ކަނޑައެޅުމަކީ ރާއްޖެ ފަދަ ކުދި ޖަޒީރާ ޤައުމުތަކަށާއި އަދި މޫސުމީ ބަދަލުތަކުން އަސަރުކުރާ ޤައުމުތަކަށް ލިބިގެންދިޔަ އުންމީދެއްގެ ގޮތުގައި ސިފަކުރައްވާފައެވެ.

މޫސުމީ ބަދަލުތަކުން ރާއްޖެއަށް ބޮޑެތި އަސަރުތުތަކެއް ކުރަމުންދާއިރު މިފަދަ ޤައުމުތަކުގެ ދިރިހުރުން ގުޅިފައިވަނީ ބޮޑެތި ގައުމުތަކުން ނިންމާ މިފަދަ ނިންމުންތަކުގެ ސަބަބުންކަން މިނިސްޓަރ ފާހަގަކުރެއްވިއެވެ. އަދި ކުރިއަރާފައިވާ ޤައުމުތަކުން މި ފަންޑަށް އެހީތެރިވުވުމުގެ މުހިންމު ކަމުގެ މައްޗަށްވެސް ވަނީ އަލުއަޅުވާލައްވާފައެވެ.

ރާއްޖެއަކީ އަބަދުވެސް މޫސުމަށް އަންނަ ބަދަލުތަކުގެ ވާހަކަ ދައްކައި ބައިނަލްއަޤްވާމީ ޕްލެޓްފޯމްތަކުގައިވެސް މި މައްސަލައިގައި އަޑުއުފުލަމުންދާ ޤައުމެއްކަމަށް މިނިސްޓަރ ވަނީ ވިދާޅުވެފައެވެ.

ކޮޕް28 ސަމިޓް ކުރިއަށްދަނީ ޔުނައިޓެޑް އަރަބް އެމިރޭޓްސްގެ ދުބާއީގައެވެ. މި ސަމިޓް 12 ޑިސެމްބަރާއި ހަމައަށް ކުރިއަށްދާނެއެވެ. މިއަހަރުގެ ސަމިޓްގައި 160 ގައުމެއްގެ ވެރިން ބައިވެރިވެވަޑައިގަންނަވައެވެ.