ހޯމް ސޯލާގެ ނަމުގައި ކުރީ ސަރުކާރުން ފެށި ޕްރޮގްރާމް މަގޭ ސޯލާގެ ނަމުގައި މިސަރުކާރުން އަލުން އިފްތިތާޙްކޮށްފިއެވެ.

މަގޭ ސޯލާގެ ނަމުގައި ރީބްރޭންޑްކޮށް އަލުން މި ޕްރޮގްރާމް އިފްތިތާޙްކޮށްފައި ވަނީ އިއްޔެއެވެ. މިޕްރޮގްރާމް އިފްތިތާޙް ކުރުމަށް ބޭއްވި ރަސްމިއްޔާތު ބާއްވާފައި ވަނީ، މާފަންނު ރޭޑިއޯ ބިލްޑިންގގައިއެވެ. މިޕްރޮގްރާމް އިފްތިތާޙްކޮށްދެއްވީ، މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޠާރިޤު އިބްރާހީމެވެ.

މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ވިދާޅުވީ، މަގޭ ސޯލާ ޕްރޮގްރާމްގެ އަމާޒަކީ، ކަރަންޓު ބިލަށް ކުރާ ހޭދަ ކުޑަކުރުމާއި ތެލުން އުފައްދާ ހަކަތަ ބޭނުންކުރާ މިންވަރު މަދުކުރުން ކަމަށެވެ. އަދި މިޕްރޮގްރާމް ހިންގާނީ ސަރުކާރާއި ސަރުކާރު ހިއްސާވާ ޔުޓިލިޓީ ކުންފުނިތަކާއި، ބޭރުގެ އެހީދޭ ޖަމާޢަތްތަކާއި ގުޅިގެން ކަމުގައިވެސް އެމިނިސްޓްރީން ވަނީ ބުނެފައެވެ.

އެމިނިސްޓްރީން ބުނީ އައު ސަރުކާރުން ފެށި މި ޕްރޮގްރާމްގެ ފުރަތަމަ ފިޔަވަހީގެ ދަށުން، ސޯލާ ނިޒާމްތައް ބެހެއްޓުމަށް ފުރުޞަތު ދޭނީ، ގޭބިސީތަކަށް ކަމަށެވެ. އަދި މިގޮތަށް ދޫކުރާ ސޯލާ ޕީވީ ނިޒާމްތަކަކީ، ދިގު މުއްދަތުން ފައިސާ ދައްކައި ޚަލާސް ކުރާ ގޮތަށް ކުރިޔަށް ގެންދާނެ މަޝްރޫޢެއް ކަމުގައިވެސް މިނިސްޓްރީން ބުންޏެވެ.

ކުރީ ސަރުކާރުގައި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީއާ ފެނަކަ ކޯޕަރޭޝަން ގުޅިގެން ހޯމް ސޯލާގެ ނަމުގައި، ފެށި ޕްރޮޖެކްޓްގެ ދަށުން އަތޮޅުތަކުގެ ގޭބިސީތަކުގައި ވަނީ، ސޯލާ ހަރުކޮށް އިއާދަކުރަނިވި ހަަކަތައިން ހަކަތަ ބޭނުން ކުރުމުގެ މަސައްކަތް ފަށާފައެވެ. މިގޮތުން ކުރީ ސަރުކާރު ނިމުނު އިރު،  ރާއްޖޭގެ 300 ގެއެއްގެ ފުރާޅުގައި 888 ކިލޯވޮޓްގެ ކަރަންޓް އުފެއްދޭ ސޯލާ ނިޒާމްތައް ވަނީ ޤާއިމްކޮށްފައެވެ. 

2030ވަނަ އަހަރުގެ ނިޔަލަށް ރާއްޖެއަކީ ކާބަން އެމިޝަންސް ނެޓް ޒީރޯ ގައުމަކަށް ހެދުމަށް ދިވެހި ސަރުކާރުން ކަނޑައަޅާފަައިވާ އަމާޒުގެ ދަށުން، ހޯމް ސޯލާ ޕްރޮގްރާމް ހިންގުން ފެނަކަ ކޯޕަރޭޝަނާއި ކުރީ ސަރުކާރުން ހަވާލުކުރީ، މިދިޔަ 2022ވަނަ އަހަރުގެ ޖެނުއަރީ މަހުގެ 6 ވަނަ ދުވަހުގައެވެ. މިގޮތުން ފެނަކައިން އެޕްރޮގްރާމް ހިންގާތާ މިހާރު ވަނީ އެއް އަހަރާއި 11 މަސްދުވަސް ވެފައެވެ.

ކަރަންޓް ބިލްތަކަށް އާއްމުން ކުރަންޖެހޭ ހޭދަކުރުމަށް އެހީވެދިނުމުގެ ގޮތުން، އަމިއްލަ ގޭބިސީތަކުގައި ސޯލާ ޕެނަލްތައް ހަރުކޮށްގެން ހަކަތަ ބޭނުން ކުރެވޭނެ ގޮތް ހަދައި ދިނުމަށް މިސަރުކާރުގެ ފުރަތަމަ 14 ހަފްތާގެ  މަސައްކަތްތަކުގެ ތެރޭގައި ހިމަނާފައިވެއެވެ.