ޔޫއެފާ ޗެމްޕިއަންސް ލީގުގެ ގްރޫޕް އޭ ގައި ބުދަ ދުވަހުގެ ރޭ މެންޗެސްޓަރ ޔުނައިޓެޑުން ނިކުތީ ތުރުކީގެ ގަލަޓަސަރާއިއާ ދެކޮޅަށެވެ. އިސްތަންބޫލްގައި ކުޅުނު މި މެޗަށް ނިކުތްއިރު ގަލަޓަސަރާއީ ބަލިކޮށް ގްރޫޕްގެ 2 ވަނައަށް އެރުމުގެ ފުރުސަތު ޔުނައިޓެޑަށް އޮތެވެ. ނަމަވެސް މެޗު ނިމުނީ 3-3 އިން އެއްވަރުވެ، ގްރޫޕްގެ އެންމެ ފުލުގައި ޔުނައިޓެޑް އޮވެގެނެވެ.

މި މެޗަށް ނިކުތްއިރު ޔުނައިޓެޑުގެ ސަޕޯޓަރުންނަށް އުނދަގޫ ކުރަމުން ދިޔަ އިސްތަންބޫލްގެ ހިތި ތަޖުރިބާއެއް އޮތެވެ. އެއީ މީގެ ތިރީސް އަހަރު ކުރިން، 1993 ވަނަ އަހަރުގެ ނޮވެމްބަރު މަހު ގަލަޓަސަރާއީއާ ދެކޮޅަށް އިސްތަންބޫލްގައި ކުޅުނު ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގެވެ. އެ މެޗު 0-0 އިން އެއްވަރުވެ، އެ ސީޒަންގެ ޗެމްޕިއަންސް ލީގުން ޔުނައިޓެޑަށް އަލްވަދާއު ކިޔަން ޖެހުނު ހިތި ހަނދާނެވެ. 

މެޗު ފަށައިގެން މާ ގިނަ އިރުތަކެއް ނުވެ ޔުނައިޓެޑުން ލީޑު ނެގިއެވެ. މެޗުގެ 11 ވަނަ މިނެޓުގައި މި ގޯލު ކާމިޔާބު ކޮށްދިނީ ބުރޫނޯ ފެނާންޑޭޒް ދިން ޕާހަކުން ޔުނައިޓެޑްގެ ޒުވާން ފޯވާޑް އަލެހާންޑްރޯ ގަނާޗޯއެވެ. ޔުނައިޓެޑުން ލީޑު ފުޅާކުރީ އޭގެ 7 މިނެޓު ފަހުން، ގަލަޓަސަރާއީގެ ޕެނަލްޓީ އޭރިޔާ ބޭރުން ބްރޫނޯ ކާމިޔާބުކޮށްދިން ގޯލަކުންނެވެ.

ގަލަޓަސަރާއީއިން އެމީހުންގެ ފުރަތަމަ ގޯލު ކާމިޔާބު ކުރީ، އިކާޑޯއަށް ބްރޫނޯ ކުރި ފައުލަކަށް އޭރިޔާ ކައިރިން ލިބުނު ހިލޭ ޖެހުމަކުންނެވެ. މި ހިލޭ ޖެހުން އެ ޓީމަށް ކާމިޔާބު ކޮށްދިނީ މި ސީޒަންގައި އެ ޓީމަށް ބަދަލުވި ހަކީމް ޒިޔެޗްއެވެ. ފުރަތަމަ ހާފު ނިމުމުގެ ކުރިން ދެވަނަ ގޯލެއްވެސް ގަލަޓަސަރާއީއިން ކާމިޔާބު ކުރިއެވެ. ނަމަވެސް އިކާޑޯގެ މި ގޯލު ވަނީ އޮފްސައިޑްކަމަށް ނިންމާފައެވެ. 

ދެވަނަ ހާފު ފަށައިގެން 10 މިނެޓު ކުޅުނު ފަހުން އަނެއްކާވެސް ފެނުނީ ޔުނައިޓެޑްގެ ގޯލެކެވެ. މެކްޓޮމިނޭގެ ޗެމްޕިއަންސް ލީގުގެ ފުރަތަމަ ގޯލާއެކީ އަނެއްކާވެސް ޔުނައިޓެޑްކޮޅަށް މެޗު ވަރަށް ބޮޑަށް އެނބުރުނެވެ. ނަމަވެސް އޭގެ 8 މިނެޓު ފަހުން މެޗުގެ އޮއިވަރު ބަދަލުވާން ފެށިއެވެ. މި ފަހަރުވެސް ބްރޫނޯ ކުރި ފައުލަކަށް ގަލަޓަސަރާއީއަށް ލިބުނު ހިލޭ ޖެހުން ކާމިޔާބުކޮށްދިނީ ޒިޔެޗްއެވެ. މި ގޯލަކީ ޔުނައިޓެޑްގެ ކީޕަރު އޮނާނާގެ އަތުގައި ޖެހި، އޭނާގެ އިހުމާލުން ވަތް ގޯލެކެވެ.

ގަލަޓަސަރާއީއިން މެޗުގެ ސްކޯ ހަމަހަމަކުރީ ޒިޔެޗް ފަހިކޮށްދިން ފުރުސަތަކުން މުޙައްމަދު އަކްތުރްކޮގްލޫއެވެ. 

މި ގޯލަށްފަހު ވެސް ޔުނައިޓެޑަށް ލީޑު ނެގުމަށް ރަނުގެ ފުރަސަތެއް ލިބުނެވެ. ނަމަވެސް ގަލަޓަސަރާއީގެ ގްރީސް ކީޕަރު، މުސިލޭރާގެ ހުޝިޔާރުކަމުން އެ ފުރުސަތު ނާކާމިޔާބުވީއެވެ. 

މި ނަތީޖާއާއެކީ، ގްރޫޕް ސްޓޭޖުގެ ފަހު ބުރުގެ މެޗުތަކަށް ދާއިރު ޔުނައިޓެޑުން ޖެހޭނީ ޓޭބަލްގެ އެއްވަނައިގައި އޮތް ބެޔާން ބަލިކުރާށެވެ. އަދި އެ ވަރަކުން ނުފުދޭނެއެވެ. ކޮންމެ ޓީމަކަށް 5 ޕޮއިންޓާއެކު ގްރޫޕްގެ 2 އަދި 3 ވަނައިގައި އޮތް ކޯޕަންހޭގަން އާއި ގަލަޓަސަރާއީ މެޗުން އެއްވެސް ޓީމެއް މޮޅު ވިޔަސް، މިހާތަނަށް 4 ޕޮއިންޓު ލިބިފައިވާ ޔުނައިޓެޑު މުބާރާތުން ކަޓާނެއެވެ.