Advertisement
ކުރީގެ ޓޫރިޒަމް ޢަލީ ވަހީދު --
އިނގިރޭސި ވިލާތުން ޢަލީ ވަހީދުގެ ކިބައިން މަޢާފަށް އެދި 20 ހާސް ޕައުންޑްގެ ބަދަލެއް ދޭން ނިންމައިފި
ކުރީގެ ޓޫރިޒަމް މިނިސްޓަރ ޢަލީ ވަހީދު އިނގިރޭސި ވިލާތުގައި ހައްޔަރުކުރީ، ޤާނޫނާއި ޚިލާފަށް ކަމުގައި ވަނީ، އިނގިރޭސި ދައުލަތުން ޢަލީ ވަހީދުގެ ކިބައިން މަޢާފަށް އެދި 20000 ޕައުންޑްގެ ބަދަލެއް ދިނުމަށް ނިންމާފައިވާ ކަމުގައި އޭނާ ވިދާޅުވެއްޖެއެވެ.
އަލީ ވަހީދު ކުރެއްވި ޓްވީޓެއްގައި ވިދާޅުވީ، އިނގިރޭސިވިލާތުން، އޭނާގެ ކިބައިން މަޢާފަށް އެދި، އެޤައުމުގެ ސަރުކާރުން އަޅުގަނޑު ހައްޔަރުކުރީ ޤާނޫނާ ޚިލާފަށްކަން ކަނޑައަޅައި، ވިހިހާސް ސްޓާލިންގ ޕައުންޑުން ބަދަލުދޭން ނިންމާފައިވާ ކަމަށެވެ. އަދި ވަގުތު ނެގިއަސް ޙައްޤަށް ނަސްރު ލިބޭނެ ކަމުގައި ޢަލީ ވަހީދު ވަނީ ވިދާޅުވެފައެވެ.
އަލީ ވަހީދުގެ ފަރާތުން ވަކާލާތުކުރި ލޯފާމުގެ ފަރާތުން ނެރުނު ނޫސްބަޔާނެއްގައި ބުނީ، 2021 ވަނަ އަހަރުގެ އޮގަސްޓް މަހުގެ ތެރޭގައި، ޢަލީ ވަހީދު ހައްޔަރުކުރީ އެޤައުމުގެ އިމިގްރޭޝަން ޤާނޫނާއި ޚިލާފުވިކަމަށް ބުނެކަމަށެވެ. އެހެން ނަމަވެސް، އިނގިރޭސި ވިލާތުގެ ކޯޓުގައި އެއީ ޤާނޫނާއި ޚިލާފަށް ކުރި ބަންދެއްކަން ސާބިތުކޮށްދެވިފައިވާ ކަމުގައިވެސް އެ ލޯފާމުން ވަނީ ބުނެފައެެެވެ.
ޓޫރިޒަމް މިނިސްޓަރުކަމުގެ މަޤާމުގައި ހުންނެވި އަލީ ވަހީދު އިނގިރޭސި ވިލާތަށް ވަޑައިގެންނެވީ، އޭނާގެ މައްޗަށް ތުހުމަތު ކުރެވުނު ޖިންސީ ގޯނާގެ މައްސަލަތަކެއް ކުރިޔަށް ދަނިކޮށެވެ. އެހެން ނަމަވެސް އެމައްސަލަތައް ވެސް އަލީ ވަހީދުގެ މައްޗަށް ސާބިތެއް ނުވެއެވެ.
