އައިލެންޑާސް އެޑިއުކޭޝަނުން ހިންގާ ފިންލޭންޑް އިންޓަނޭޝަނަލް ސްކޫލާއި ބިލަބޮންގް ހައި އިންޓަނޭޝަނަލް ސްކޫލުގެ ދަރިވަރުންނަށް ބަހުގެ ހިދުމަތް ދޭން ފަށައިފިއެވެ.

އައިލެންޑާސް އެޑިއުކޭޝަނުން ބުނި ގޮތުގައި މި ހިދުމަތަކީ ހުޅުމާލެއިން އެ ދެ ސްކޫލަށް އަންނަ ދަރިވަރުންގެ އަދަދު އިތުރުވުމާ ގުޅިގެން ތައާރަފްކުރި ހިދުމަތެކެވެ. އަދި މި ހިދުމަތުގެ ސަބަބުން ހުޅުމާލޭގައި މިހާރު ދިރިއުޅޭ ދަރިވަރުން ކުރިމަތިލަމުން އަންނަ ދަތުރުފަތުރުކުރުމުގެ ދަތިތަކަށް ހައްލު ލިބޭނެ ކަމަށް ވެސް އެ ކުންފުނިން ބުންޏެވެ.

މި ހިދުމަތް ތައާރަފްކުރީ އޭއެމްޔޫ ކޮންސްޓްރަކްޝަންއާ ގުޅިގެންނެވެ. އެ ކުންފުނިން ބުނީ މި ހިދުމަތް ރައްކާތެރިގޮތުގައި ދަރިވަރުންނަށް ފޯރުކޮށްދިނުމުގައި ދަރިވަރުން ބަހަށް އަރާ ވަގުތުތަކާއި ފައިބައި ވަގުތުތަކުގައި ފުލުހުންނާއި ޓްރެފިކް ޕޮލިހުގެ އެއްބާރުލުން ލިބެމުންދާ ކަމަށެވެ.

އައިލެންޑާސް އެޑިއުކޭޝަނުން ބުނި ގޮތުގައި ދުވާލަކު ބަހުގެ 2 ނުވަތަ 3 ދަތުރުކުރުމަށް ހަމަޖެހިފައިވާކަމަށެވެ. މި ދަތުރުތައް ޝެޑިއުލްކޮށްފައި ވަނީ ވަގުތު މެނޭޖުކޮށް, ދަރިވަރުންގެ ރައްކާތެރިކަން ކަށަވަރު ކުރެވޭނެ ގޮތްތައް ބަލައި, ސްކޫލަށް ދާންޖެހޭ ވަގުތަށް ދެވޭނެ ގޮތްތަކަށް ވިސްނައިގެން ކަމަށް އެ ކުންފުނިން ވަނީ ބުނެފައެވެ.