ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ގެ އިތުބާރު ނެތް ކަމުގެ މައްސަލަ އަންނަ އާދީއްތަ ދުވަހުގެ ޖަލްސާ އަށް އެޖެންޑާ ކޮށްފިއެވެ.

އެމްޑީޕީގެ 49 މެންބަރުންނާއި މިނިވަން މެންބަރެއް ކަމަށްވާ ނޮޅިވަރަމް ދާއިރާގެ މުހައްމަދު ނަޝީދު އަބްދުﷲ ސޮއިކުރައްވައި ހުށަހެޅި އެ މައްސަލައިގެ ނޯޓިސް އީވާ އަށް ފޮނުވާފައި ވަނީ މި މަހުގެ 20 ގައެވެ.

މަޖިލީހުގެ ގަވައިދު ބުނާ ގޮތުން ނޯޓިސް ފޮނުވާތާ 14 ދުވަހަށް ފަހު އެންމެ ފުރަތަމަ ބާއްވާ ޖަލްސާގައި އެ މައްސަލަ ކުރިއަށް ގެންދަން ޖެހެއެވެ. މަޖިލީހުގެ އާންމު ކޮމިޓީން ވަނީ އާދީއްތަ ދުވަހު އީވާ ޖަވާބުދާރީވުމަށް 30 މިނިޓުގެ ވަގުތެއް ދިނުމަށް ނިންމައިފައެވެ.

އީވާ މަގާމުން ވަކިކުރަން ހުށަހެޅި ސަބަބުތައް ބަޔާން ކުރަމުން އެމްޑީޕީން ބުނެފައި ވަނީ ކުރީގެ ރައީސް މުހައްމަދު ނަޝީދާއި އީވާއާ އާއިލީ ގޮތުން ގުޅުން އޮތަސް ނަޝީދުގެ އިތުބާރު ނެތް ކަމުގެ މައްސަލާގައި އީވާ އަމަލު ކުރެއްވީ އަމިއްލަ ޒާތީ މަސްލަހަތު އިސް ކުރައްވައިގެން ކަމަށެވެ.

އީވާ މަޖިލީހަށް އިންތިހާބުކުރީ އެމްޑީޕީ މެންބަރެއް ގޮތުގައި ކަމަށް ވިޔަސް އެ ޕާޓީން ވަކިވުމާ އެކު، އެ އެމްޑީޕީއާ އެކު، ހަދާފައިވާ ކެންޑިޑޭޓުންގެ އިގުރާރާ ވެސް އީވާ ހިލާފުވެފައިވާ ކަމަށް އެ ޕާޓީން ބުންޏެވެ. އެހެންކަމުން އެ ޕާޓީގެ މެންބަރުންގެ އިތުބާރު އީވާ އަށް ގެއްލިފައިވާ ކަމަށް ގަރާރުގައި ބުނެފައިވެއެވެ.