ރިޔާސީ އިންތިޚާބުގެ ކެމްޕޭނަށް ބޭނުންވާ މަޢުލޫމާތު އެއްކުރުމުގެ ގޮތުން އެމްޑީޕީގެ މެމްބަރުން ރާއްޖޭގެ ހުރިހާ ރަށެއްގައި ކުރިޔަށް އޮތް ތިން ދުވަހު ހަރަކާތްތެރިވާނެ ކަމުގައި އެމްޑީޕީން ބުނެފިއެވެ.

އެޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ ޗެއާޕާސަންގެ ނައިބު އިބްރާހީމް ވަހީދު ވިދާޅުވީ، އެމްޑީޕީން މިމަހުގެ 18 އިން 20އަށް ހުރިހާ ދާއިރާއަކަށް ކުރާ ދަތުރުަގައި މާލެއިން އަތޮޅުތަކަށްވެސް 400 އަށްވުރެ ގިނަ މެމްބަރުން ދަތުރު ކުރާނެ ކަމަށެވެ. އަދި ރަށްރަށުންވެސް 600އެއްހައި މެމްބަރުން މިހަރަކާތްތަކުގައި ބައިވެރިވާނެ ކަމުގައި އިބްރާހިމް ވަހީދު ވިދާޅުވިއެވެ.

މީގެ އިތުރުން އޭނާ ވިދާޅުވީ، މިދަތުރުގެ ތެރެއިން ރާއްޖޭގެ މީހުން ދިރިއުޅޭ ހުރިހާ ރަށެއްގައި އެމްޑީޕީގެ ދިދައެއް ނެގުމުގެ ހަރަކާތެއް ހުކުރު ދުވަހު ބޭއްވުމަށް ނިންމާފައިވާ ކަމަށެވެ. އަދި މިދަތުރުގެ ތެރެއިން އެމްޑީޕީއަށް މެމްބަރު އިތުރު ކުރުމުގެ ހަރަކާތްތަކާއި، ޕޯސްޓަރ ހަރުކުރުމުގެ ހަރަކާތްތަކެއްވެސް އަތޮޅުތެރޭގައި ކުރިޔަށްދާނެ ކަމުގައި އޭނާ ވިދާޅުވިއެވެ.

ރިޔާސީ އިންތީޚާބަށް އެމްޑީޕީގެ ކެމްޕޭން ފެށުމަށް ތައްޔާރުވަމުން ދާއިރު، އެޕާޓީގެ ހަރަކާތްތައް އިތުރުކޮށް މެމްބަރު އިތުރު ކުރުމުގެ މަސައްކަތް ފަށާފައި މިވަނީ، އެމްޑީޕީގެ ރިޔާސީ ޕްރައިމަރީގައި ވާދަކޮށް ނާކާމިޔާބީއާ ކުރިމަތިލާން ޖެހުނު އެމްޑީޕީގެ ރައީސް މުޙައްމަދު ނަޝީދު ވެރިކަމަށް ކުރިމަތި ލެއްވުމަށްޓަކައި އައު ޕާޓީއެއް އުފައްދާނެކަން އިޢުލާނުކޮށްފައި ވަނިކޮށެވެ.