މި މަހުގެ 24 އަދި 25 ގައި ކުރިޔަށްދިޔަ ގައުމީ އެތުލެޓިކްސް މުބާރާތުގެ ފިރިހެން އެންމެ މޮޅު އެތުލީޓުގެ މަގާމު އަނެއްކާވެސް ހަސަން ސާއިދު ދިފާއުކޮށްފިއެވެ. 

ރާއްޖޭގައި ހުރި އެންމެ ބާރު ދުވުންތެރިޔާ މި އަހަރުގެ ގައުމީ މުބާރާތުގެ އެންމެ މޮޅު އެތުލީޓުގެ މަގާމު ދިފާއު ކުރުމަށް ކުރި ދަތުރުގައި އޭނާވަނީ 100 މީޓަރާއި 200 މީޓަރު ދުވުމުން ރަން މެޑަލް ހޯދާފައެވެ. 100 މީޓަރު ދުވުމުން ސާއިދު ރަން މެޑަލް ހޯދީ 10.88 ސިކުންތުން ރޭސް ނިންމައިގެންނެވެ. އަދި 200 މީޓަރު ދުވުމުން އޭނާ ރަން މެޑަލް ހޯދީ 22.04 ސިކުންތުން ފައިނަލް ހީޓް ކާމިޔާބުކޮށްގެންނެވެ.

200 މީޓަރު ދުވުމުގެ ފައިނަލް ހީޓުގައި ސާއިދު، ފޮޓޯ: އިޔާން

2022 ވަނަ އަހަރުގެ ގައުމީ މުބާރާތުގައި ސާއިދު ވަނީ 100 މީޓަރާއި 200 މީޓަރު އަދި 400 މީޓަރު ދުވުމުން ރަން މެޑަލް ހޯދާފައެވެ. އަދި 4 ގުނަ 100 މީޓަރު އަދި 4 ގުނަ 400 މީޓަރު ދުވުމުން ރަން މެޑަލް ހޯދި ދިވެހި ސިފައިންގެ ކުލަބުގެ ރިލޭ ޓީމްގައިވެސް ސާއިދު ހިމެނުނެވެ. ގައުމީ މުބާރާތުގެ އިތުރުން މިދިޔަ އަހަރު ބޭއްވި އެސޯސިއޭޝަން ޗެމްޕިއަންޝިޕުގެ މޮޅު އެތުލީޓުގެ މަގާމު ވެސް އޭނާ ހޯދިއެވެ.

ކޮވިޑް-19އާ ގުޅިގެން 2020 އަދި 2021 ވަނަ އަހަރު ގައުމީ މުބާރާތްތައް ކުރިޔަކަށް ނުގެންދެއެވެ. 2019 ވަނަ އަހަރަށް ބަލާލާއިރު، އެ އަހަރުގެ ގައުމީ މުބާރާތުގެ އެއް ވަނަ ސާއިދު ހޯދީ 100 މީޓަރު ދުވުމާއި 200 މީޓަރު ދުވުމުން އަދި 400 މީޓަރު ދުވުމުން ރަން މެޑަލް ހޯދައިގެންނެވެ. އަދި ރިލޭގެ ހަތަރެއް ގުނަ 400 މީޓަރުން ސިފައިންގެ ޓީމާއެކު ރަން މެޑަލް ހޯދިއިރު ހަތަރެއް ގުނަ 100 މީޓަރުން ލިބުނީ ރިހި މެޑެއްޔެކެވެ.