ސްޕެނިޝް ލަ ލީގާގައި ހޯމަ ދުވަހުގެރޭ ޖިރޯނާ އާއި އެތުލެޓިކް ކްލަބް ބިލްބާއޯ ބައްދަލުކުރި މެޗު 1-1 އިން އެއްވަރުވެ، ޖިރޯނާއަށް މި ހަފްތާ ނިމުނު އިރު ލީގުގެ އެއްވަނަ ދިފާއެއް ނުކުރެވުނެވެ. 

މެޗުގެ ފުރަތަމަ ހާފުގައި މޮޅަށް ކުޅެ ގިނަ ހަމަލާތަކެއް އުފައްދާފައިވަނީ ބިލްބާއޯއެވެ. ނަމަވެސް ޖިރޯނާގެ ހުޝިޔާރު ކީޕަރު ޕައުލޯ ގައްޒަނިޔާ ވަނީ އެ ހަމަލާތައް ދިފާއުކޮށްފައެވެ. ޖިރޯނާގެ އަމިއްލަ ދަނޑުގައި ކުޅުނު މި މެޗުގައި އެންމެ ފުރަތަމަ ކުރިހޯދީ ޖިރޯނާއެވެ. އެއީ މެޗުގެ 55 ވަނަ މިނެޓުގައި ވިކްޓަރ ސިގަންކޯވް ކާމިޔާބުކޮށްދިން ގޯލަކުންނެވެ. ނަމަވެސް އޭގެ 12 މިނެޓު ފަހުން މެޗުގެ 67 ވަނަ މިނެޓުގައި ބިލްބާއޯގެ ވިލިއަމްސް އެ ޓީމަށް ގޯލެއް ކާމިޔާބުކޮށްދީ ނަތީޖާ ހަމަހަމަކުރިއެވެ.

މި ސީޒަންގައި މޮޅު ނަތީޖާތަކެއް ނެރެމުންއަންނަ ޖިރޯނާ މި މެޗާ ހަމައަށް އައިއިރު އޮތީ 2 ޕޮއިންޓުގއ ލީޑަކާ އެކު ލީގުގެ އެއްވަނައިގައެވެ. ނަމަވެސް މި ނަތީޖާއާ އެކީ ޖިރޯނާ އާއި ރިއަލް މެޑްރިޑް މިވަނީ ޕޮއިންޓުގެ ގޮތުން ހަމަހަމަވެފައެވެ. އަދި ކޮންމެ ޓީމަކަށް ވެސް 14 މެޗުން 35 ޕޮއިންޓް ލިބިފައިވީ ނަމަވެސް، މެޑްރިޑް އެއްވަނައަށް އަރާފައިވަނީ ގޯލުގެ ފަރަގުންނެވެ.

ބިލްބާއޯއިން މި ނެރުނު ނަތީޖާއާ އެކީ، ޖިރޯނާ ޖެހިޖެހިގެން މެޗުތަކުން މޮޅުވަމުން އައި ފޯމް މިވަނީ 5 މެޗަށްފަހު ނިމުމަކަށް އައިސްފައެވެ.  ބިލްބާއޯ މިހާރު އޮތީ 14 މެޗުން 25 ޕޮއިންޓު ހޯދާ، ލީގުގެ 6 ވަނައިގައެވެ.