ނައިބު ރައީސް ހުސައިން މުޙައްމަދު ލަތީފް ޑރ. ޖަމީލުގެ ބޮލުގައި އެޅުވި ތުހުމަތުތަކަށް، ރައިސް ޔާމީނުގެ ޤާނޫނީ ވަކީލު އަދި ރައީސް ޔާމީނުގެ ފުރަތަމަ ނައިބުރައީސް ޑރ. މުހައްމަދު ޖަމީލް އަހުމަދު ރައްދު ދެއްވައިފިއެވެ.

އޮންލައިން ނޫސް މިހާރަށް ދެއްވި ބަސްދީ ގަތުމެއްގައި، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެފައި ވަނީ، ޑރ. ޖަމީލަކީ ރައީސް ޔާމީނަށް އިޚްލާސްތެރި ބޭފުޅެއް ނޫންކަމަށާއި އެކަމުގެ ހެކި ހުރިކަމަށެވެ.

ރައީސް ޔާމީނާއި ޕީޕީއެމް ޕީއެންސީގެ ލީޑަރޝިޕާއި ދެމެދު މެދުވެރިއެއްގެ ދައުރު އަދާކުރުމުގައި، ޑރ. ޖަމީލް ވަނީ ޕީޕިއެމް ޕީއެންސީގެ ލީޑަރޝިޕަށް ކަންތައްތަކެއް އޮޅުވާލާފައި  ކަމަށާއި އެކަމުގެ ހެކިތައް އެބަހުރި ކަމަށް ހުސައިން މުޙައްމަދު ލަޠީފް ވަނީ ވިދާޅުވެފައެވެ. ނައިބު ރައީސް ކަމުގެ މަޤާމަށް ވަޑައިގެންނެވުމުގެ ކުރިން، އަދި ރައީސް ޔާމީނުގެ ވެރިކަމުގެ ދައުރުގައި ޙުސައިން މުޙައްމަދު ލަޠީފަކީ ރައީސް ޔާމީނާއި ވަރަށް އަރިހުގައި އުޅުއްވި ބޭފުޅެކެވެ.

މިހާރު ނޫހަށް ދެއްވި ބަސްދީގަތުގައި، ޑރ. މުހައްމަދު ޖަމީލު އަޙްމަދުގެ މައްޗަށް، ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ކުރެއްވި ތުހުމަތުތަކަށް ރައްދު ދެއްވައި، ޑރ. ޖަމީލު ވިދާޅުވީ، އެމަނިކުފާނުގެ ކުށަކީ، ހުރިހާ ބޭފުޅުން ރައީސް ޔާމީނު ދޫކޮށްލި ވަގުތުގައި އެމަނިކުފާނާއި އެކުގައި ހުންނެވުންތޯ ސުވާލު ކުރައްވާފައެވެ.

އަދި ރައީސުލްޖުމްހޫރިއްޔާ ކަމުގެ މަޤާމުގައި ހުންނަވައިގެން ޙުސައިން މުޙައްމަދު ލަޠީފް ދެއްކެވި ވާހަކަތަކާއި މެދުވެސް ޑރ. ޖަމީލު ވަނީ ސުވާލު އުފައްދަވާފައެވެ.

ރައީސް ޔާމީނާއި ޕީޕީއެމް ޕީއެންސީގެ ލީޑަރޝިޕާއި މައްސަލަ ޖެހި، ރައީސް ޔާމީން ޕީޕީއެމް ދޫކޮށްލެއްވުމުން، ސަރުކާރުގެ އިސް ހުރިހާވެރިންނާއި މިނިސްޓަރުން އަދި ސަރުކާރަށް ތާއީދުކުރާ އެކްޓިވިސްޓުން ވަނީ، ރައީސް ޔާމިނާއި އެކު މިވަގުތު ތިއްބެވި، ޑރ. މުހައްމަދު ޖަމީލް އަޙްމަދާއި އަދި މުހައްމަދު މަލީހާއި ދިމާކޮށްލާފައެވެ. މިގޮތުން ކުރިން ރައީސް ޔާމީނާއި ދެކޮޅަށް، ޑރ. ޖަމީލާއި، މަލީހް ދައްކަވާފައި ހުރި ވާހަކަފުޅުތައް ސޯޝަލްމީޑިއާގައި ދަނީ ފަތުރަމުންނެވެ.