އެއްދައުރުން އަނެއް ދައުރަށް ރައްޔިތުންގެ މަޖިލީހުގައި ހިމެނޭ މެމްބަރުންގެ އަދަދު އިތުރުވަމުންދާތީ ރައްޔިތުންގެ މަޖިލީހުގެ މެމްބަރުންގެ އަދަދު ލިމިޓްކުރަން ހުށައެޅި ހުށައެޅުން ފާސްނުކޮށް މަޖިލީހުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މެމްބަރުންގެ އަދަދު 76އަށް އިތުރު ނުވާނޭ ގޮތަށް ލިމިޓްކުރުމަށް، ޤާނޫނު އަސާސީގެ 71 ވަނަ މާއްދާއަށް އިސްލާޙް ހުށައެޅުއްވީ، އެމްޑީޕީގެ ޓިކެޓްގައި ރައްޔިތުންގެ މަޖިލީހަށް ހޮވިވަޑައިގެންނެވުމަށްފަހު މިހާރު، ރައްޔިތުންގެ މަޖިލީހުގައި ދަ ޑިމޮކްރެޓްސް ތަމްސީލްކުރައްވާ، ހުޅުދޫ ދާއިރާގެ މެމްބަރު އިލްޔާސް ލަބީބެވެ.

މިއަދުގެ ޖަލްސާގައި މިއިސްލާހަށް މަޖިލީހުގެ ތަޅުމުގައި ވޯޓަށް އެހުމުން އިސްލާހް ފާސްކުރުމަށް ފެންނަ ކަމަށް ވޯޓު ދެއްވީ އެންމެ 12 މެމްބަރުންނެވެ. 38 މެމްބަރުން ވޯޓު ދެއްވީ އެއާ ދެކޮޅަށެވެ.

18 ވަނަ ރައްޔިތުންގެ މަޖިލީހުގައި ތިއްބެވީ 82 މެމްބަރުންނެވެ. އެހެން ނަމަވެސް މިހާރު ހިނގަމުން މިދާ 19 ވަނަ ރައްޔިތުންގެ މަޖިލީހުގައި 87 މެމްބަރުން ތިއްބަވައަށެވެ. އަދި ކުރިޔަށް އޮތް 20 ވަނަ ރައްޔިތުންގެ މަޖިލީހަށް އިތުރު 6 ގޮނޑިއެއް އިތުރުވާއިރު، މިއަންނަ ދައުރުގައި މަޖިލީހުގައި 93 މެމްބަރުން ތިއްބަވާނެއެވެ.

މަޖިލީހުގެ މެމްބަރުންގެ އަދަދު މިހާރު ކަނޑައަޅާފައި އޮންނަނީ އާބާދީގެ ނިސްބަތުން ކޮންމެ 5000 ރައްޔިތުންނަށް އެއް މެމްބަރަކުން ހުންނަ އުސޫލުންނެވެ. އެހެން ނަމަވެސް މިއީ އެންމެ ހަމަޖެހޭ ގޮތް ނޫކަމަށް ބުނެ އެގޮތް ބަދަލުކުރުމަށް އާއްމުންނާއި ސިޔާސީ ފަރާތްތަކުންވެސް ދަނި ގޮވާލަމުންނެވެ.