ރައްޔިތުންގެ މަޖިލީހުގެ ހިނގަމުން މިދާ ދައުރު ޑިސެމްބަރު 7 އާއި ހަމައަށް ކުރިޔަށް ގެންދިޔުމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކޮށްފިއެވެ.

ރައްޔިތުންގެ މަޖިލީހުގެ ހިނގަމުން މިދާ ދައުރުގެ އެންމެ ފަހު ޖަލްސާ ކުރިން އޮތް ގޮތުން ބާއްވަން އޮތީ މިމަހުގެ 29 ވާ ބުދަ ދުވަހުގައެވެ. އެހެން ނަމަވެސް ބަޖެޓްގެ މަސައްކަތްތަކާއި މަޖިލީހުގެ އެހެން ބައެއް މަސައްކަތްތައް ނުނިމި ހުރުމާއިއެކު އަންނަ ޑިސެމްބަރު މަހުގެ 7 ވަނަ ދުވަހާއި ހަމައަށް މަޖިލީހުގެ ޖަލްސާ ކުރިޔަށް ގެންދިޔުމަށް ރިޔާސަތުން ހުށައަޅުއްވައި އެގޮތަށް ފެނޭތޯ މެމްބަރުންގެ މެދުގައި ވަނީ ވޯޓަށް އަހާފައެވެ.

މަޖިލީހުގެ ދައުރު ދަންމާލުމަށް ވޯޓަށް އެހުމުން، 51 މެމްބަރުން ވޯޓު ދެއްވީ، ޑިސެމްބަރު 7 ވަނަ ދުވަހާއި ހަމައަށް މަޖިލީހުގެ ޖަލްސާތައް ކުރިޔަށް ގެންދިޔުމަށް ފެންނަ ކަމަށެވެ. 6 މެމްބަރަކު ވަކިކޮޅަކަށް ވޯޓު ނުދެއްވި އިރު، މިދޫ ދާއިރާގެ މެމްބަރު އަހުމަދު ސިޔާމް މުހައްމަދު ވޯޓު ދެއްވީ ދެކޮޅަށެވެ.

ރައްޔިތުންގެ މަޖިލީހުގެ މިދައުރު ނިންމައި ޗުއްޓީއަށް ދިޔުމުގެ ކުރިން، 2024 ވަނަ އަހަރަށް ލަފާކުރާ ދައުލަތުގެ ބަޖެޓް ފާސްކުރަން ޖެހޭނެއެވެ. 

ޑިސެމްބަރު މަހުގެ 7 ވަނަ ދުވަހު މަޖިލިސް ޗުއްޓީއަށް ދިޔުމަށްފަހުގައި ދެން މަޖިލީހުގެ ދައުރު ފަށާނީ، 2024 ވަނަ އަހަރުގެ ފެބުރުއަރީ މަހުގައެވެ. އެއީ މިހާރު ހިނގަމުން މިދާ 19 ވަނަ ރައްޔިތުންގެ މަޖިލީހުގެ އެންމެ ފަހު ދައުރެވެ.