ހިޔާފްލެޓްގެ ދެ އެޕާޓްމަންޓް އެއްކޮށްލި މައްސަލައިގައި ފްލެޓްގެ ވެރިފަރާތްތައް 200000ރ އިން ޖޫރިމަނާކޮށް، 10 ދުވަހުގެ ތެރޭގައި ފްލެޓްގެ ތަޅާލި ފާރު އަލުން ރޭނުމަށް އެންގުމުން އެކަންވެސް ކޮށްފައި ނުވާތީ 14 ދުވަހުގެ ތެރޭގައި ތަން ހުސްކުރުމަށް އެ ދެފްލެޓްގެ ވެރިފަރާތަށް އާބަންކޯއިން އަންގައިފިއެވެ.

ތަން ހުސްކުރުމަށް އާބަންކޯއިން ދެ ފުލެޓްގެ ވެރިފަރާތަށް ނޯޓިސް ފޮނުވާފައި ވަނީ މިއަދުއެވެ.

ދެފްލެޓް އެއްކޮށްލައިގެން އެންމެ ޒަމާނީ ފެންވަރަށް އެތަން ހަދާފައިވާއިރު، ދެފްލެޓްގެ މެދުފާރު ތަޅާލާފައި ވަނީ އާބަންކޯގެ ހުއްދަ ނެތިއެވެ. މިތަނުން އެއް ފްލެޓަކީ، "ހިޔާ ޔޫނިއަން"ގެ ނައިބު ރައީސް އަހުމަދު ޝަމާލުގެ ފްލެޓްކަން އެނގިފައިވެއެވެ. އަނެއް ފްލެޓަކީ، އޭނާގެ އާއިލާ މީހެއްގެ ފްލެޓެކެވެ.

މިއީ ހިޔާ ފްލެޓްގެ އެއްބަސްވުމާއި ޚިލާފުވެގެން ފުލެޓް އަތުލުމަށް ފްލެޓް ލިބިފައިވާ ފަރާތަކަށް ނޯޓިސް ފޮނުވި ފުރަތަމަ ފަހަރެވެ.