ރައްޔިތންގެ މަޖިލީހުގައި ނުނިިމި ގިނަ މަސައްކަތްތަކެއް ހުރުމާއި، އެކު ރައްޔިތުންގެ މަޖިލީހުގައި މިހާރު ހިނގަމުންދާ ދައުރު، ޑިސެމްބަރު މަހުގެ 7 ވަނަ ދުވަހާއި ހަމައަށް އިތުރުކުރުމަށް، ހުށައަޅައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ ރިޔާސަތުގައި އިންނަވައި، މަޖިލީހުގެ ރައިސް، މުހައްމަދު އަސްލަމް ވިދާޅުވީ، ރައްޔިތުންގެ މަޖިލީހުގެ މިދައުރުގެ ތެރޭގައި ނިންމަންޖެހޭ މުހިއްމު މަސައްކަތްތަކެއް އެބަހުރި ކަމަށެވެ. އޭގެ ތެރެއިން އެންމެ މުހިއްމު ކަމަކީ އަންނައަހަރަށް ލަފާ ކުރާ ދައުލަތުގެ ބަޖެޓް ފާސްކުރުމުގެ މަސައްކަތެވެ. މީގެ އިތުރުންވެސް މަޖިލީހުގައި އިތުރު މަސައްކަތްތައް ކުރަން ހުރިކަން މަޖިލީހުގެ ރައީސް އަސްލަމް ފާހަގަ ކުރެއްވިއެވެ.

މަޖިލީހުގެ ދައުރު ޑިސެމްބަރު މަހުގެ 7 ވަނަ ދުވަހާއި ހަމައަށް ދިގުދަންމާލާނަމަ އެކަމަށް މަޖިލީހުގައި ވޯޓަށް އަހައި ފާސްކުރަންޖެހޭނެއެވެ. އެހެންވެ މިއަދު 1:30ގައި އެކަމަށް ވޯޓަށް އަހާނެއެވެ.

ރައްޔިތުންގެ މަޖިލީހުގެ މިދައުރުގެ ގިނަ ދުވަސްތަކެއް ފާއިތުވެގެން ދިޔައީ، ރައީސް ނަޝީދު އިތުބާރު ނެތްކަމުގެ މައްސަލާގައި މަޖިލީހުގައި މަރުތަޅު އެޅި، މަޖިލިސް ކުރިޔަށް ގެންދެވޭނެ ގޮތެއް ނެތިއެވެ. އެންމެ ފަހުން ރައްޔިތުންގެ މަޖިލީހުގެ ރައީސް ކަމުގެ މަޤާމުން ނަޝީދު އިސްތިއުފާ ދެއްވައި، މަޖިލީހުގެ ރިޔާސަތަކާއި އަސްލަމް ހަވާލުވެވަޑައިގެންނެވުމަށްފަހު އެންމެ ފުރަތަމަ ފައްޓަވާފައި ވަނީ ދައުލަތުގެ ބަޖެޓުގެ މަސައްކަތެވެ. އިއްޔެ ވަނީ ދައުލަތުގެ ބަޖެޓުގެ ބަހުސް މަރުހަލާ ނިންމާލާފައެވެ.