ދިވެހިރާއްޖޭގެ ފަހުގެ ތާރީޚްދުށް އެންމެ ނުރައްކާތެރި ޢުދުވާނީ ޙަމަލާ ހިންގައި، ކުށެއް ނެތް 19 ދިވެހި ޝަހީދުކޮށްލުުމުގައި އިސްްކޮށްހުރި މޭސްތިރިޔާ، ހ. ހާޖަރާގޭ ޢަބުދުﷲ ލުޠުފީގެ ހުކުމްތައް ތަންފީޒްކޮށް ނިމި، 35 އަހަރު ފަހުން މިނިވަންވެއްޖެއެވެ.

ނޮވެމްބަރު 3 ގެ އުދުވާނީ ހަމަލާއަށް މިއަހަރު 35 އަހަރު ފުރުނު އިރު، ޢަބުދުﷲ ލުޠުފީ އޭނާގެ މައްޗަށް ކޮށްފައިވާ ހުކުމްތަން ތަންފީޒްކޮށް ނިމި މިނިވަންވީ މިއަދުއެވެ. ޢަބުދުﷲ ލުޠުފީއާއެކު ނޮވެމްބަރު 3 ގެ ޢުދުވާނީ ހަމަލާ ހިންގިމުގައި ބައިވެރިވި، ސަގަރު އަހްމަދު ނާސިރު ވަނީ، މީގެ 9 އަހަރު ކުރިން، 2014 ވަނަ އަހަރު މިނިވަންވެފައެވެ. ލުޠުފީ މިނިވަންވުން ލަސްވީ އޭނާ ހުކުމް ތަންފީޒްނުކޮށް ފިލައިގެން އުޅުމާއި، އަދި އޭނާގެ މައްޗަށް އިތުރު ދައުވާތަކެއް ސާބިތުވެ ހުކުމްތަންފީޒް ކުރަންޖެހުމާއި ގުޅިގެންނެވެ.

ބޭސްފަރުވާއަށް ރާއްޖެއިން ބޭރަށް ފޮނުވުމުން ޢަބުދުﷲ ލުޠުފީ ފިލީ 2010 ވަނަ އަހަރުގައެވެ. އޭރު އޭނާގެ ޙުކުމް ތަންފީޒްކޮށް ނިމެން ބާކީ އޮތީ 4 އަހަރެވެ. އެހެން ނަމަވެސް، 9 އަހަރު ދުވަހު ފިލައިގެން އުޅުމަށްފަހު، ޢަބުދުﷲ ލުޠުފީ އަމިއްލައަށް، ސްރީލަންކާގައި ހުންނަ ދިވެހިރާއްޖޭގެ އެމްބަސީއަށް ހާޟިރުވީ، 2019 ވަނަ އަހަރުގެ އޭޕްރީލް ފަހު ހަފުތާގައި ސްރީލަންކާގައި ދިން އީސްޓަރޑޭ ޓެރަރިސްޓް ހަމަލާއާއި ގުޅިގެން އެޤައުމުގެ ސިފައިން ޚާއްސަ އޮޕަރޭޝަނެއް ފަށާފައި ވަނިކޮށެވެ.

ޙުކުމް ތަންފީޒްނުކޮށް ފިލައިގެން އުޅުމާއި ގުޅިގެން، ލުޠުފީގެ މައްޗަށް، 7 މަހާއި 6 ދުވަހަށް ޖަލަށް ލުމުގެ އިތުރު ހުކުމެއްވެސް އައެވެ.

ނޮވެމްބަރު 3 ގެ އުދުވާނީ ޙަމަލާގައި، ސިފައިންގެ 8 ބޭކަލަކާއި، އާއްމުންގެ ތެރެއިން 11 މީހުން ޝަހީދުވިއެވެ. އުދުވާނީ ހަމަލާއާއި ގުޅިގެން އޭރުގެ ހައިކޯޓުގައި ކުރިޔަށް ގެންދިޔަ ޝަރީއަތްތަކުގައި ޢަބުދުﷲ ލުޠުފީގެ މައްޗަށްވެސް އިއްވީ މަރުގެ ޙުކުމެވެ. އެހެން ނަމަވެސް ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލްޣައްޔޫމް ވަނީ އެހުކުމް އުމުރު ދުވަހުގެ ޖަލު ހުކުމަށް ބަދަލުކޮށްދެއްވާފައެވެ. ޢަބުދުﷲ ލުޠުފީއާ ސަގަރު ނާސިރު 25 އަހަރުގެ ޖަލު ޙުކުމް ތަންފީޒް ކުރުމުން ޖަލުން މިނިވަންވީ، ދިވެހިރާއްޖޭގައި އުމުރު ދުވަހުގެ ޖަލު ޙުކުމް ކަމުގައި ކަނޑައަޅާފައި އޮންނަނީ 25 އަހަރު ކަމުގައި ވާތީއެވެ.