މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ދަށުން ހިންގާ ހުރިހާ ޔުނީފޯމް އެޅި މުައްސަސާއެއްގެ އޮފިސަރުންނަށް ހިންގާ އަސާސީ ތަމްރީން ކޯހަކީ އެއްކޯހަކަށް ހެދުމުގެ ވިސްނުން ގެންގުޅުއްވާ ކަމުގައި، މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ ޢިޙްސާން މިހެން ވިދާޅުވީ، ޕްރިޒަން އޮފިސަރުންގެ އަސާސީ ތަމްރީނު ޕްރޮގްރާމްގެ 28 ވަނަ ބެޗުގެ ދަސްވެނިވުމުގެ ރަސްމިއްޔާތު ޝަރަފުވެރި ކޮށްދެއްވައި ރޭ ދެއްކެވި ވާހަކަފުޅުގައެވެ. މިރަސްމިއްޔާތު ބާއްވާފައި ވަނީ، ރޭ މާފުށީ ޖަލުގައެވެ.

މިރަސްމިއްޔާތުގައި އަލަށް މޯލްޑިވުސް ކަރެކްޝަނަލް ސަރވިސް އާއި ގުޅި އަސާސީ ތަމްރީން ފުރިހަމަކޮށް ދަސްވެނިވި އޮފިސަރުންނާއި މުޚާޠަބު ކުރައްވައި، މިނިސްޓަރ ޢަލީ އިޙްސާން ވިދާޅުވީ، ޕްރިޒަން އޮފިސަރުންނަކީ، ގޮންޖެހުންތަކާއި ކުރިމަތިލާން ޖެހޭ ބައެއް ކަމަށެވެ. މިގޮތުން ވަސީލަތްތައް މަދު އެހެން ނަމަވެސް މަސްއޫލިއްޔަތު ބޮޑު މިފަދަ މުއައްސަސާއެއްގައި މަސައްކަތް ކުރުމުގައި، ދިމާވާ ގޮންޖެހުންތަކާއި އެކުވެސް، އެމީހަކުކޮށްގެން ހުރި މަޤާމުގެ ހުވާގެ މަތިން ހަނދާން ބަހައްޓަންޖެހޭނެ ކަމުގައި މިނިސްޓަރ ވިދާޅުވިއެވެ. އަދި ޕްރިޒަން އޮފިސަރުންގެ އެބޭފުޅުންގެ ހުވަޔާއި ޚިލާފްވުމުގެ ކަންކަން މީގެ ކުރިންވެސް ހިނގާފައިވާ ކަމަށާއި، އެފަަދަ ކަންކަމުގެ ސަބަބުން ދާޚިލީ ސަލާމަތަށްވެސް ނުރައްކާވެގެން ދިޔަކަން މިނިސްޓަރ ފާހަގަކުރެއްވިއެވެ. އެހެންކަމުން އެފަދަ ކަމެއްގައި ޕްރިޒަން އޮފިސަރުން ބައިވެރި ނުވުމަށާއި، އަދި ކޮށްގެންތިބި ހުވާގެ މަތީގައި ސާބިތުވެ ތިބުމަށް ހޯމް މިނިސްޓަރ ޢަލީ އިޙްސާން ނަސޭޙަތްތެރިވެވަޑައިގެންނެވިއެވެ.

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ދަށުން ހިންގާ ހުރިހާ ޔުނީފޯމް އެޅި މުައްސަސާއެއްގެ އޮފިސަރުންނަށް އެއްތަމްރީން ޕްރޮގްރާމެއް ހިންގުމުގެ ވިސްނުން ގެންގުޅުއްވާކަމަށް ހޯމް މިނިސްޓަރ ވިދާޅުވިއިރު، އެމިނިސްޓްރީގެ ދަށުން ހިންގާ ޔުނީފޯމްއެޅ މުއައްސަސާތަކަކީ، ދިވެހި ފުލުހުންގެ ޚިދުމަތާއި، މޯލްޑިވްސް ކަރެކްޝަނަލް ސަރވިސަސްއެވެ.