2024 ވަނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށައަޅާފައިވާ ބަޖެޓުގެ ބަހުސް މަރުޙަލާ ނިންމާލައިފިއެވެ.

މިއަދު ހެނދުނުން ފެށިގެން ހަވީރު، 4:15 އާއި ހަމައަށް ރައްޔިތުންގެ މަޖިލީހުގެ މިއަދު ޖަލްސާ ވަނީ ކުރިޔަސް ގެންގޮސްފައެވެ. ބަޖެޓް ބަހުސް ނިންމާލައި، މަޖިލީހުގެ ޖަލްސާ ނިންމަވާލައްވަމުން، ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވަނީ، މާދަމާ ރައްޔިތުންގެ މަޖިލީހުގެ ޖަލްސާއެއް އޮންނާނެކަން އިޢުލާނު ކުރައްވާފައެވެ.

މިއަދު ބަޖެޓު ބަހުސް ނިންމާލި އިރު، މަޖިލީހުގެ ތަޅުމުގައި ބަޖެޓަށް ޖުމުލަ 51 މެމްބަރަކު ބަހުސްކުރައްވާފައިވެއެވެ. އަދި މުޅި ބަޖެޓުގެ ބަހުސަށް 12 ގަޑިއިރާއި، 23 މިނިޓް ހޭަދަވެފައިވާ ކަމުގައިވެސް މަޖިލީހުގެ ރައީސް މުޙައްމަދު އަސްލަމް ޢިއުލާނު ކުރެއްވިއެވެ.

އަސްލަމް ވިދާޅުވީ، މަޖިލީހުގެ ތަޅުމުގައި މަޖިލީހުގެ މެމްބަރުން ބަޖެޓާއި ގުޅޭ ގޮތުން ފާޅުކުރެއްވި ޚިޔާލުތަކާއި ފާހަގަކުރެއްވި ނުކުތާތައް، ފާހަގަވާނެ ފަދައިން އިދާރީ މޭޒުން ބަޖެޓްކޮމިޓީއާ ހިއްޞާކޮށްދެއްވުމަށް އެދިވަޑައިގަންނަވާ ކަމަށެވެ.

އަންނަ އަހަރަށް ލަފާކޮށް މަޖިލީހަށް ހުށައަޅާފައި ވަނީ، 49.5 ބިލިޔަން ރުފިޔާގެ ބަޖެޓެކެވެ. ބަޖެޓު މަޖިލީހަށް ފޮނުވާފައި ވަނީ، އޮކްޓޫބަރު 31 ގައެވެ. ބަޖެޓު މަޖިލީހަށް ހުށައެޅީ އައު ސަރުކާރުގެ ލަފަޔާއި އިރުޝާދާއި އެކުގައި އައު ސަރުކާރުން ބޭނުންވާ ބަދަލުތައްވެސް ހިމަނައިގެންނެވެ.