ވެހިކަލުން ތޮއްޖެހިފައިވާ މާލޭގެ ޕާކިންގ މައްސަލަ ހައްލު ކުރުމަށް އަންނަ އަހަރުގެ ބަޖެޓުގައި ހިމަނާފައި ވަނީ 2 ލައްކަ ރުފިޔާ ކަމުގައި ރައްޔިތުންގެ މަޖިލީހުގެ، ހެންވޭރު އުތުރު ދާއިރާގެ މެމްބަރު އިބްރާހިމް މުޢިއްޒު ވިދާޅުވެއްޖެއެވެ.

ރައްޔިތުންގެ މަޖިލީހުގައި މިހާރު ކުރިޔަށްދާ، 2024 ވަނަ އަހަރަށް ލަފާކުރާ ދައުލަތުގެ ބަޖެޓު ބަހުސްގައި މުއިއްޒު ވިދާޅުވީ، މާލޭގެ ޕާކިން މައްސަލައަކީ އިންތިހާއަށް ބޮޑު މައްސަލައަކަށް ވެފައި ވާއިރު، މާލޭގެ ޕާކިންގ މައްސަލަ ހައްލު ކުރުމަށް އަންނަ އަހަރުގެ ބަޖެޓުގައި އެންމެ 2 ލައްކަ ރުފިޔާ ހިމަނާފައި ވުމަކީ ބޮޑު ޖޯކެއް ކަމަށެވެ. މިގޮތުން މާލޭގެ އެންމެ ބޮޑު އެއް މައްސަލަ، އެންމެ 2 ލައްކަ ރުފިޔާއިން ހައްލު ކުރަނީ ކިހިނެއްތޯވެސް މުޢިއްޒު ވަނީ ސުވާލު އުފައްދަވާފައެވެ.

މުއިއްޒު ވިދާޅުވީ، މާލެ ސިޓީ ކައުންސިލުން މާލޭގެ މަގުތައް ފޮތޮފޮތިކޮށް ގޮޅިޖަހައި އެގޮޅިތައް ވަނީ، އެޑްވާންސްކޮށް ފައިސާ ނަގައި ކުއްޔަށް ދީފައި ކަމަށެވެ. މީގެ އިތުރުން މާލޭގެ ޕާކިންގެ މައްސަލަ އޮތް ހިސާބުގެ މައްޗަށް އަލިއަޅުއްވާލައްވައި މުއިއްޒު ވިދާޅުވީ، މާލޭގެ ގޭގެއިން މީހުން ވަދެނުކުތުމަށް މަގުމަތީގައި އުޅެން ޖެހެނީ ޕެލެޓްބާއްވައިގެން ކަމަށާއި، އެމްބިއުލާންސް ފަދަ އުޅަނދުތަކުގައި ބަލި މީހުން އުފުލުމަށްވެސް ދަތިތައް ކުރިމަތިވެފައި އޮތް ކަމަށެވެ. އަދި މާލޭގެ މަގުތަކުގައި ޑަބަލް ޕާކު ކުރާ ހިސާބަށް މާލެ ތޮއްޖެހިއްޖެކަމުގައިވެސް އޭނާ ވިދާޅުވިއެވެ. 

މީގެ އިތުރުން މުއިއްޒު ވިދާޅުވީ، ޕާކިންގެ މައްސަލައަށް ހައްލު ހޯދުމަށް އަންނަ އަހަރުގެ ބަޖެޓުގައި އެއްވެސް އަމާޒެއް ހިފާފައި ނުވާކަން ފާހަގަވެގެންދާކަމަށެވެ.