ފޮރިން މިނިސްޓަރ ޢަބުދުﷲ ޝާހިދުގެ ޢިތުބާރުނެތްކަމުގެ މައްސަލަ ރައްޔިތުންގެ މަޖިލީހަށް ހުށައަޅައިފިއެވެ.

އިދިކޮޅު ޕާޓީތަކުގައި ހިމެނޭ މެމްބަރުން ހުށައެޅުއްވި ޝާހިދުގެ އިތުބާރު ނެތްކަމުގެ މައްސަލައިގައި އިއްޔެ އެމްޑީޕީން ވަކިވެވަޑައިގެންނެވި ރައީސް ނަޝީދުގެ ފިކުރެއްގެ ދިރުމުގައި ބައިވެރިވެވަޑައިގެން އުޅުއްވާ، މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ) ސޮއެކުރައްވާފައިވެއެވެ.

ޝާހިދުގެ އިތުބާރު ނެތްކަމުގެ މައްސަލަ އިދިކޮޅު ޕާޓީތަކުގެ މެމްބަރުން ރައްޔިތުންގެ މަޖިލީހަށް ހުށައަޅާފައި ވަނީ، މޮރިޝަސް އާއި ރާއްޖެއާ ދެމެދު ކަނޑުގެ ސަރަހައްދު ބެހުމުގައި ރާއްޖެއިން އިޙްމާލުވެފައިވާ ކަމަށް ބުނެއެވެ. އެމައްސަލައިގައި ބަންޑާރަ ނައިބު އިބުރާހީމް ރިއްފަތުގެ އިތުބާރު ނެތްކަމުގެ މައްސަލަވެސް އިދިކޮޅު މެމްބަރުންގެ ފަރާތުން ވަނީ މަޖިލިސްއަށް ވައްދާފައެވެ.

ރައްޔިތުންގެ މަޖިލިސް މެދުވެރިކޮށް ވަޒީރެއްގެ އިތުބާރު ނެތްކަމަށް ފާސްކުރެވޭނީ، 43 މެމްބަރުންގެ ވޯޓު ލިބިގެން ނަމަވެސް އެއަދަދަށް އިދިކޮޅަށް ވޯޓު ހަމަކުރެވޭނެ ކަމަކަށް ނުބެލެވެއެވެ. އެމްޑީޕީއަށް ރައްޔިތުންގެ މަޖިލީހުގައި ސާފު އަޣުލަބިއްޔަތު އެބަ އޮތެވެ.