މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ އެތުލީޓްސް ކޮމިޝަނުން އިސްނަގައިގެން، އެތުލީޓުންނަށް ހާއްސަ ފޯރަމެއް ފަށައިފިއެވެ. މި ފޯރަމަކީ، ރާއްޖޭގެ އެތުލީޓުންނަށް ހުރި ފުރުސަތުތަކާއި، އެތުލީޓުންނާއި ގުޅުންހުރި އެހެނިހެން ކަންކަމާ ގުޅޭގޮތުން މަޝްވަރާކުރުމަށާއި، އެތުލީޓުންގެ ހިޔާލު ހޯދުމަށް ކުރިޔަށް ގެންދާ ފޯރަމެކެވެ. އެގޮތުން މި ޕޯރަމްގައި، އެމްއޯސީގައި ރެޖިސްޓަރކޮށްފައިވާ 17 އެސޯސިއޭޝަނަކުން އެތުލީޓުން އަންނަނީ ބައިވެރިވަމުންނެވެ.

ދެ ދުވަހުގެ މުއްދަތަށް ކުރިޔަށް ގެންދިއުމަށް ހަމަޖެހިފައިވާ މި ފޯރަމް ފަށާފައިވަނީ ހުކުރު ދުވަހުއެވެ. މި ފޯރަމް ފެށުމަށް ބޭއްވި ޙާއްސަ ރަސްމިއްޔާތުގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލްގެ އިތުރުން، ކުޅިވަރާ ބެހޭ ވަޒީރު އަބްދުﷲ ރާފިޢު ވެސް ބައިވެރިވެ ވަޑައިގެންނެވިއެވެ. 

ފޯރަމްގައި ކުޅިވަރާ ބެހޭ ވަޒީރު އަބްދުﷲ ރާފިޢު ވާހަކަފުޅު ދައްކަވަނީ

ފޯރަމްގެ ފުރަތަމަ ދުވަހުގެ ޙާއްސަ ހަރަކާތެއްގެ ގޮތުން، އެތުލީޓުންނަށް ފުރުސަތު ލިބުނީ ކުޅިވަރާ ބެހޭ ވަޒީރާއި ސުވާލުކޮށް ކަންތައްތައް އޮޅުންފިލުވުމުގެ ފުރުސަތެކެވެ. މީގެ އިތުރުން ހުކުރު ދުވަހުގެ ސެޝަންގައި، އެތުލީޓުންގެ ނަފްސާނީ ދުޅަހެޔޮކަމާ ގުޅޭ ސެޝަންއަކާއި، ކުޅިވަރުން ރިޓަޔާ ކުރުމަށްފަހު އެތުލީޓުން ކެރިއަރ ބިނާ ކުރާނެ ގޮތާ ގުޅޭ ގޮތުން މައުލޫމާތު ބަދަލު ކުރެވުނެވެ.