Advertisement
އިޒްރޭލުގެ ބޯޓަށް ހަމަަލާ އެރުމުން ބޯޓުގައި ރޯވެފައި ---
އިޒްރޭލުގެ ކާގޯ ބޯޓަކަށް އިންޑިއާ ކަނޑުގެ ސަރަހައްދުން ހަމަލާދީފި
އިންޑިއާ ކަނޑުގެ ހުޅަނގު ސަރަހައްދުގައި ދަތުރުކުރަމުން ދިޔަ އިޒްރޭލަށް ނިސްބަތްވާ ކާގޯ ބޯޓަކަށް ޑްރޯން ހަމަލާއެއް ދީފިއެވެ.
އިޒްރޭލުންނާއި އެމެރިކާއިން ތުހުމަތުކޮށްފައިވާ ގޮތުގައި މިހަމަލާ ދީފައި ވަނީ އިރާނުންނެވެ. މިހަމަލާގެ ސަބަބުން ބޯޓުގެ އެއް ފަރާތަށް ވަރަށް ބޮޑަށް ގެއްލުން ލިބިފައިވެއެވެ.
އެމެރިކާގެ ދިފާއީ އޮފިޝަލަކު ހޮނިހިރު ދުވަހު އެސޯސިއޭޓެޑް ޕްރެސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ މި ހަމަލާ ދީފައިވަނީ އީރާނުގައި އުފައްދާފައިވާ ޝަހީދު-136 ޑްރޯން ބޭނުންކޮށްގެން ކަމަށް ބެލެވޭ ކަމަށެވެ.
މޯލްޓަރގެ ދިދައިގައި، ދަތުރުކުރަމުން އަންނަ، ސީއެމްއޭ ސީޖީއެމް ސައިމީ ކާގޯބޯޓް އޮޕަރޭޓް ކުރަމުން އަންނަނީ، ފްރާންސްއިން ނަމަވެސް މިބޯޓުގެ މިލްކުވެރިފަރާތަކީ، އިޒްރޭލުގެ މަހުޖަނެކެވެ. އެމެރިކާގެ އޮފިޝަލުން ހާމަކޮށްފައިވާ ގޮތުގައި އެބޯޓަށް ޑްރޯނަކުން ހަމަލާދީފައި ވަނީ، ބޯޓު ބައިނަލްއަޤުވާމީ ކަނޑުގެ ސަރަހައްދުގައި ދަތުރުކުރަމުން ދަނިކޮށެވެ. އެހެން ނަމަވެސް މިހާދިސާގައި އެބޯޓުގައި އެވަގުތު ތިބި ފަޅުވެރިންގެ ތެރެއިން އެއްވެސް މީހަކަށް ގެއްލުމެއް ނުލިބެއެވެ.
ރަތް ކަނޑުގެ އައްސޭރިފަށުން ދަތުރުކުރި އިޒްރޭލަށް ނިސްބަތްވާ އުޅަނދެއް ވެސް ޔަމަނުގެ ހޫތީން ވަނީ މި ހަފުތާގެ ކުރީކޮޅު އަތުލައިގެން، ހުދައިދާ ބަނދަރަށް ގެންގޮސްފައެވެ.
ގައްޒާގައި އިޒްރޭލުން ހިންގަމުންގެންދާ ޤަތުލް ޢާއްމުތަކާއި ދެކޮޅަށް ހޫތީން ގެންދަނީ އިޒްރޭލަށް ޑްރޯން ހަމަލާތަކާއި މިސައިލް ހަމަލާތައް ދެމުންނެވެ.
