ނޫސްވެރިކަމުގެ ޙަޔާތީ އަރުތައިގެ އެވޯޑް މިއަހަރު ދެބޭފުޅަކަށް ދެއްވައިފިއެވެ.

މޯލްޑިވްސް މީޑިއާކައުންސިލުން ދެމުން އަންނަ މިއެވޯޑު މިއަހަރު  ލިބިވަޑައިގެންނެވީ، ދައުލަތުގެ މީޑިއާ ޕީއެސްއެމްގެ ޢަބުދުﷲ ރަމީޒާއި، ދައުރު ނޫހުގެ މެނޭޖިންގ އެޑިޓަރު ހިރިގާ އަހުމަދު ޒާހިރަށެވެ.

މި ދެބޭފުޅުންނަށް ހަޔާތީ އަރުތައިގެ އެވޯޑް ހަވާލުކޮށްދެއްވީ، މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް، އިބްރާހިމް ވަހީދު (އަސްވާޑު) އެވެ. 

ޙަޔާތީ އަރުތައިގެ އެވޯޑް ލިބިވަޑައިގެންނެވި ޢަބުދުﷲ ރަމީޒަކީ، ރާއްޖޭގެ ނޫސްވެރިކަމުގެ ދާއިރާގައި 40 އަހަރު ދުވަހު ޚިދުމަތް ކުރައްވާފައިޥާ އަދި މިހާރުވެސް ޚިދުމަތުގައި ހުންނެވި ބޭފުޅެކެވެ. އަދި ހިރިގާ ޒާހިރަކީ ނޫސްވެރިކަމުގައި 34 އަހަރު މަސައްކަތްކުރައްވާފައިވާ އަދި މިހާރުވެސް ނޫސްވެރިކަމުގައި ދެމި ހުންނެވިބޭފުޅެކެވެ.

ނޫސްވެރިކަމުގެ ދާއިރާއިން މިދެ ބޭފުޅުންނަށް ހަޔާތީ އަރުތައިގެ އެވޯޑު ދެއްވުމުގެ އިތުރުން މިރޭ ވަނީ، މޯލްޑިވްސް މީޑިއާ ކައުންސިލްގެ އައު ލޯގޯވެސް އިފްތިތާޙްކޮށްފައެވެ.

މޯލްޑިވްސް މީޑިއާކައުންސިލުން މެދު ނުކެނޑި ނޫސްވެރިކަމުގެ އެވޯޑް ދެމުންއަންނަ މިއީ 10 ވަނަ އަހަރެވެ. މީޑިއާކައުންސިލުން އެންމެ ފުރަތަމަ ނޫސްވެރިކަމުގެ އިނާމް ދީފައި ވަނީ، 2013 ވަނަ އަހަރުގައެވެ.