މޯލްޑިވްސް މީޑިއާ ކައުންސިލުންދޭ އަހަރުގެ އެންމެ މޮޅު ނޫސްވެރިޔާ ގެ އެވޯޑު ދައުރު ނޫހުގެ އަހްމަދު ނާއިފް ކާމިޔާބުކޮށްފިއެވެ.

ނާއިފް މިއެވޯޑު ކާމިޔާބު ކުރީ، މިހާރު ނޫހުގެ އާސިމާ ނިޒާރާއި، ރާއްޖެ ޓީވީގެ ލައިޝާ އަޙްމަދާއި ވާދަކޮށެވެ.

ނާއިފަށް މިއެވޯޑް ހަވާލުކޮށްދެއްވީ، ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ.

2010 ވަނަ އަހަރު ސަން އޮންލައިންއިން ނޫސްވެރިކަމުގެ ދާއިރާއަށް ނުކުތް އަހްމަދު ނާއިފަކީ، މިހާރު ދައުރު ނޫހުގެ ސީނިއަރ އެސޯސިއޭޓް އެޑިޓަރެވެ. ނާއިފް ވަނީ، ހަވީރު ނޫހާއި، އަވަސް އޮންލައިންގައިވެސް މަސައްކަތްކޮށްފައެވެ.

މީގެ އިތުރުން މިރޭގެ ހަފްލާގައި ވަނީ އަހަރުގެ އެންމެ އުއްމީދީ ނޫސްވެރިޔާއަށްވެސް އެވޯޑް ދީފައެވެ. އަހަރުގެ އެންމެ އުއްމީދީ ނޫސްވެރިޔާގެ އެވޯޑް ހާސިލްކޮށްފައި ވަނީ، ސަން އޮންލައިންގެ ނޫސްވެރިޔާ ނާއިލް ހަފީޒެވެ. 

މީގެ އިތުރުންވެސް އިތުރު ދާއިރާތަކުން ކަނޑައަޅާފައިވާ އެވޯޑްތައް ހާސިލްކުރި ފަރާތްތަކަށް މިރޭ ގެ ހަފްލާގައި ވަނީ އެވޯޑްތައް ދީފައެވެ. އަދި ޚާއްސަ ހިއްވަރު ދިނުމުގެ އިނާމެއްގެ ގޮތުގައި، ނޫސްވެރިޔާ އަހުމަދު ސާއިދަށްވެސް ވަނީ އިނާމްދީފައެވެ.