މޯލްޑިވްސް މީޑިއާ ކައުންސިލުންދޭ، ނޫސްވެރިކަމުގެ އެވޯޑުގައި އަންނަ އަހަރު އައު ކެޓަގަރީތަކެއް ތަޢާރަފްކުރުމަށް ހަމަޖައްސާފައިވާ ކަމުގައި މޯލްޑިވްސް މީޑިއާ ކައުންސިލުން ޢިއުލާންކޮށްފިއެވެ.

މިކަން ޢިއުލާނުކޮށްދެއްވީ، މިރޭ ބޭއްވި ނޫސްވެރިކަމުގެ އިނާމްދިނުމުގެ ހަފްލާގައި މޯލްޑިވްސް މީޑިއާ ކައުންސިލްގެ ރައީސް އަޙްމަދު މުސްޠަފާއެވެ.

މުސްތަފާ ވިދާޅުވީ، އަންނަ އަހަރު އައު ތިން އެވޯޑެއް ތަޢާރަފްކުރުމަށް ނިންމަވާފައިވާ ކަމަށެވެ. އެ އެވޯޑްތަކަކީ، ސްޓޫޑެންޓް ޖާނަލިޒަމް އެވޯޑާއި، ކޮމިއުނިޓީ ނޫހުގެ އެވޯޑާއި، އަދި ޚާއްސަ ކަވަރޭޖްގެ އެވޯޑެވެ.

މުސްޠަފާ ވިދާޅުވީ، ކައުންސިލްގެ ވިސްނުމަކީ، މީޑިއާތަކާއި ދެކޮޅަށް ފިޔަވަޅު އަޅައި ޖުރުމަނާކުރުމެއް ނޫންކަމަށާ، ކައުންސިލްގެ ވިސްނުމަކީ ނޫސްވެރިކަމުގެ ހަމަ ހިފަހައްޓައި ރަނގަޅު ނޫސްވެރިންތަކެއް ބިނާކުރުމަށް، މަސައްކަތް ކުރުން ކަމަށެވެ.

މިރޭގެ ރަސްމިއްޔާތުގައި ވަނީ ނޫސްވެރިކަމުގެ ދާއިރާއިން އެކި ވަނަތައް ޙާސިލްކުރި ނޫސްވެރިންނަށް އެވޯޑުތައް ދީފައެވެ.