ދިރާސީ އަހަރު ފެށުން އަނެއްކާ އަލުން ޖެނުއަރީމަހަށް ބަދަލުކުރުމަށް މިސަރުކާރުން ކުރާ މަސައްކަތްތަކާއި ގުޅޭ ގޮތުން، ރައްޔިތުންގެ މަޖިލީހުގައި އެޑިޔުކޭޝަން މިނިސްޓަރާއި ސުވާލު ކުރުމަށް ހުށައަޅައިފިއެވެ.

އެޑިޔުކޭޝަން މިނިސްޓަރ، އިސްމާޢީލް ޝަފީޢު މަޖިލީހަށް ހާޟިރުކޮށް ސުވާލުކުރެއްވުމަށް ހުށައަޅާފައި ވަނީ ރައްޔިތުންގެ މަޖިލީހުގެ އައްޑު މީދޫ ދާއިރާގެ މެމްބަރު ރޮޒެއިނާ އާދަމްއެވެ.

ރޮޒޭނާ ހުށައަޅުއްވާފައި ވަނީ، މިހާރު ހިނގަމުންދާ ދިރާސީ އަހަރު، 2024 ވަނަ އަހަރުގެ ޖޫން މަހު ނިމޭއިރު، އަދި އަލުން ދިރާސީ އައު އަހަރު ފަށާނީ 2025 ޖެނުއަރީގައި ކަމަށް މިނިސްޓަރ ވިދާޅުވެފައި ވާތީ، އެދެމެދުގައި ހިނގާ 6 މަސްދުވަހުގެ މުއްދަތުގައި ކުދިންގެ ކިޔެވުމާއި ގުޅޭ ގޮތުން މިނިސްޓްރީން ރާވާފައިވާ ގޮތެއް އޮޅުންފިލުއްވުމަށެވެ.

ދިރާސީ އަހަރު އައު އަހަރު، މީލާދީ އަހަރުގެ މެދުތެރެއިން ފަށާގޮތަށް ހަމަޖެއްސެވީ ކުރީ ސަރުކާރުންނެވެ. ދިރާސީ އަހަރު އެގޮތަށް ބަދަލު ކުރީ، ދިރާސީ އަހަރުގެ ބޮޑު ޗުއްޓީ ޖޫން ޖުލައިއަށް ބަދަލުކުރުމަށެވެ.

ދިރާސީ އަހަރުގެ މީލާދީ އަހަރުގެ މެދުތެރޭގައި ފަށާގޮތަށް ކުރީ ސަރުކާރުން ގެނައި ބަދަލު އުވާލައި، 2025 ވަނަ އަހަރުން ފެށިގެން ދިރާސީ އައު އަހަރު ފަށާނީ، ޖެނުއަރީ މަހުގައި ކަމަށް މިސަރުކާރުގެ އެޑިޔުކޭޝަން މިނިސްޓަރ، އިސްމާޢީލް ޝަފީޢު ވަނީ ވިދާޅުވެފައެވެ.

ކުރީ ސަރުކާރުގައި، ދިރާސީ އައު އަހަރު ފެށުން އަހަރުގެ މެދުތެރެއަށް ބަދަލުކުރުމަށްޓަކައި، 2020 ވަނަ އަހަރުގެ ދިރާސީ އަހަރު ދޮޅުއަހަރަށް ދިގުދަންމާލިއެވެ. އަދި އެއާއެކު ބައެއް ކުދިންނަށް ދިރާސީ އެއް އަހަރު ގެއްލިގެންވެސް ދިޔައެވެ. އަލުން ދިރާސީ އަހަރު ފެށުން ޖެނުއަރީމަހަށް ބަދަލުކުރާނަމަ، ދިރާސީ އެއް އަހަރު 6 މަސް ދުވަހަށް ކުރުކޮށްލަން ނުވަތަ، ދިރާސީ އަހަރުގެ ދިގުމިން ދޮޅުއަހަރަށް ދަންމާލަން ޖެހޭނެއެވެ.