ރައީސް ނަޝީދަށް އަލުން ވެރިކަމަށް އާދެވޭނެ އެއްވެސް މަގެއް ނުފެނުމުން، ރައީސް ނަޝީދު އުފެއްދެވި ފިކުރެއްގެ ދިރުމުގައި ހިމެނޭ މަޖިލިސް މެމްބަރުން އެމްޑީޕީން ވަކިވެވަޑައިގެން އައު ސިޔާސީ ޕާޓީއެއް އުފައްދަން އުޅޭކަން އެބޭފުޅުން ހާމަކުރައްަވައިފިއެވެ.

ފިކުރެއްގެ ދިރުމަކީ، ރައީސް ނަޝީދަށް އެމްޑީޕީގެ ރިޔާސީ ޕްރައިމަރީ ނާކާމިޔާބުވުމުން އެޕާޓީގެ ތެރޭގައި ރައީސް ނަޝީދު އުފެއްދެވި ވަކި ފެކްޝަނެކެވެ. އެމްޑީޕީގެ މެމްބަރު ކަމުން އެފެކްޝަނަށް ނިސްބަތްވާ މަޖިލިސް މެމްބަރުންނާއި އާއްމު ބައެއް މެމްބަރުން މިއަދުވަނީ ވަކިވެފައެވެ.

ރައީސް ނަޝީދާއިއެކު ފިކުރެއްގެ ދިރުމުގައި ތިއްބެވި މަޖިލީހުގެ މެމްބަރުން އެމްޑީޕީން ވަކިވެ ވަޑައިގެންނެވި ނަމަވެސް ރައީސް ނަޝީދު އަދިވެސް ހުންނެވީ އެމްޑީޕީގައެވެ. ރައީސް ނަޝީދު އެމްޑީީން ދޫކޮށް ނުލައްވައި ހުންނެވީ އެމަނިކުފާނު އެމްޑީޕީން ވަކިވެވަޑައިގެންފި ނަމަ މަޖިލީހުގެ ރައީސް ކަމުން ވަކިވެވަޑައިގަންނަވަން ޖެހިވަޑައިގަންނަވާނެތީ ނުވަަތަ އިތުބާރުނެތްކަމުގެ މައްސަަލަ މަޖިލީހަށް ވައްދައިގެން މަޤާމުން ވަކިކޮށްފާނެތީ ކަމަށް ވަނީ ބެލެވިފައެވެ.

ރައީސް ނަޝީދުގެ ފެކްޝަނުން ސިޔާސީ ޕާޓީއެއް އުފެްދުމުގެ މަސައްކަތް ފަށައި 3000 މީހުންގެ ސޮއި ހޯދުމުގެ މަސައްކަތް ފަށާފައިވާ ކަމަށް އެފެކްޝަނުން ބޭއްވި ނޫސްވެރިންގެ ބައްދަލުވުމުގައި ހުޅުދޫ ދާއިރާގެ މެމްބަރު އިލްޔާސް ލަބީބު ވަނީ ވިދާޅުވެފައެވެ.

ރިޔާސީ ރޭހަށް ނުކުތުމަށް އަދި ރާއްޖޭގެ ވެރިކަމުގެ ނިޒާމް ބަދަލުކުރުމަށް ރައީސް ނަޝީދު ކުރެއްވި އެއްވެސް މަސައްކަތެއްގައި ކާމިޔާބީއެއް ލިބިވަޑައެއް ނުގަތެވެ. އެންމެ ފަހުން ޖުމްހޫރީޕާޓީގެ ކެންޑިޑޭޓް ޤާސިމް އިބްރާހީމާއި އެކު ކުރިޔަށް ދިޔުމަށް ރައީސް ނަޝިދާއި އެކު ފިކުރެއްގެ ދިރުމުގައި މަސައްކަތް ކުރެއްވި ބޭފުޅުން މަޝްވަރާތައް ކުރެއްވި ނަމަވެސް އެކަންވެސް ކާމިޔާބުވާގޮތެއް ނުވިއެވެ.