އުމުރުފުޅުން 80 އަހަރުން މަތިވެފައި ވަނިކޮށް، އެއްވެސް ކުށެއް ނެތި ބައްޕާފުޅު މައުމޫނު ޢަބުދުލްޤައްޔޫމު ޖަލުގައި ބަންދުކޮށްގެން ގެންގުޅުއްވުމުންވެސް ރައީސް ޔާމީނު ދޫކޮށްނުލެއްވި، ޣައްސާނު މައުމޫނަށް، ޑރ. މުޙައްމަދު މުޢިއްޒުގެ ސަރުކާރުގެ ޑިފެންސް މިނިސްޓަރުކަން ދެއްވުމުން ރައީސް ޔާމީނު ދޫކޮށްލައްވައި އެމަނިކުފާނާއި ދެކޮޅަށް ނުކުންނަވައިފިއެވެ.

ރައީސް ޔާމީނުގެ ވެރިކަމުގައި، ޕީޕީއެމްގެ ބާރުތައް ރައީސް މައުމޫނުގެ އަތްޕުޅުން އަތުލައްވައި، އަދި އެމަނިކުފާނު ޖަލަށް ލެއްވުމުންވެސް، ޣައްސާނު މައުމޫނު ހުންނެވީ، ބޮޑު ބޭބޭފުޅު ޢަބުދުﷲ ޔާމީން ޢަބުދުލްޤައްޔޫމާއި އެކު އެމަނިކުފާނުގެ އަރިހުގައެވެ. އެކަމާއި ގުޅިގެން ޣައްސާނު މައުމޫނަށް ގިނަ ބައެއްގެ ފާޑުކިޔުންތައް އަމާޒުވެގެން ދިޔައެވެ. އަދި ބައްޕާފުޅަށާއި އާއިލާއަށް ރައީސް ޔާމީނުގެ ސަރުކާރުން ބޮޑެތި އަދި އިހާނަތްތެރި އަނިޔާތަކެއް ދެއްވަމުން ގެންދެވި އިރު، ރައީސް ޔާމީނާއިއެކު ޣައްސާނު ސިޔާސީ މަސައްކަތުގައި އުޅުއްވާތީ، ގިނަ ބަޔަކު ޣައްސާނުގެ އިޚްލާޞްތެރިކަމާއި މެދު ސުވާލުވެސް އުފެއްދިއެވެ.

ރައީސުލްޖުމްހޫރިއްޔާގެ މަޤާމަށް ޑރ. މުޙައްމަދު މުޢިއްޒު ވަޑައިގެންނެވުމަށްފަހުގައި، ޣައްސާނު މައުމޫނަށް ހުށައެޅުއްވި، ޑިފެެންސް މިނިސްޓަރު ކަމުގެ މަޤާމު ޤަބޫލު ކުރެއްވީ، އޭނާ ހުންނެވި، ރައްޔިތުންގެ މަޖިލީހުގެ ތ. ގުރައިދޫ ދާއިރާގެ ގޮނޑިވެސް ދޫކޮށްލެއްވުމަށް ފަހުގައެވެ. 

ރައީސް ޑރ. މުޙައްމަދު މުޢިއްޒުގެ ސަރުކާރާއި، ރައީސް ޔާމީނާއި ދެމެދު ގުޅުންތައް ގޯސްވެ ރައީސް ޔާމީން ޕީޕީއެމް ދޫކޮށްލައްވައި ނުކުމެވަޑައިގެންނެވުމުން ޣައްސާނު މައުމޫނު ވަނީ، ރައީސް ޔާމީނާއި ވަކިވެވަޑައިގެންފިކަން ނުސީދާކޮށް އިޢުލާނު ކުރައްވާފައެވެ.

ޣައްސާން މައުމޫން އެކްސްގައި ކުރެއްވި ޕޯސްޓުގައި ވަނީ، ދިވެހިން ރައީސް މުއިއްޒުއާ އެއްކޮށް ކުރިޔަށް ދިޔުމަށް ގޮވާލާފައެވެ.