ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމުގައި ހުންނެވި އީވާ ޢަބުދުﷲ އެމްޑީޕީން ވަކިވެވަޑައިގެންނެވުމާއި ގުޅިގެން އޭނާ އެ މަޤާމުން ދުރުކުރުމުގެ މަސައްކަތް އެމްޑީޕީގެ ޕާލަމެންޓްރީ ގުރޫޕުން ފަށައިފިއެވެ.

އެނގިފައިވާ ގޮތުގައި އީވާގެ އިތުބާރު ނެތްކަމުގެ މައްސަލަ ފާސްކޮށް އޭނާ މަޖިލީހުގެ ނައިބުރައީސް ކަމުގެ މަޤާމުން ވަކިކުރުމުގެ މައްސަލަ ހުށައެޅުމަށްޓަކައި އެމްޑީޕީގެ ޕާލަމެންޓްރީ ގުރޫޕުގައި ހިމެނޭ 22 މެމްބަރުން މިހާރު ވަނީ ސޮއެކުރައްވާފައެވެ. ރައްޔިތުންގެ މަޖިލީހުގެ ނައިބުރައީސް ކަމުގެ މަޤާމުން އީވާ ދުރުުކުރަން ބޭނުންވަނީ، 43 ވޯޓެވެ. ފިކުރެއްގެ ދިރުމަށް ތާއީދު ކުރައްވައި، އީވާ ހިމެނޭ ގޮތުން އެމްޑީޕީގެ 12 މެމްބަރަކު މިއަދު އެޕާޓީން ވަކިވެވަޑައިގެންނެވި ނަަމަވެސް އަދިވެސް އެޕާޓީގައި ޖުމުލަ 55 މެމްބަރުން އެބަތިއްބެވިއެވެ. 

އީވާގެ އިތުބާރު ނެތްކަމުގެ މައްސަލަ މަޖިލީހަށް ވައްދާނެ ދުވަހެއް އަދި އެމްޑީޕީއަކުން ހާމައެއް ނުކުރެއެވެ.