ޓޫރިޒަމް ދާއިރާއަށް މުހައްމަދު އުމަރު މަނިކު (އެމްޔޫ މަނިކު) ކުރައްވަމުން ގެންދަވާ އިހްލާސްތެރި ހިދުމަތުގެ އަގުވަޒަންކޮށް ސައުތު އޭޝިއަން ޓްރެވަލް އެވޯޑްސް(ސާޓާ) އެވޯޑު އޭނާއަށް އަރުވައިފިއެވެ.

މި އަހަރުގެ ސާޓާ އެވޯޑު ހަފްލާ ބޭއްވީ މިދިޔަ އޮކްޓޯބަރު މަހު އިންޑިއާގެ ބެންގަލޫރުގައި ހުންނަ ޝެރެޓަން ގްރޭންޑް ހޮޓެލްގައެވެ. ނަމަވެސް އެ ހަފްލާއަށް އެމްޔޫ މަނިކަށް ވަޑައިނުގެންނެވުމުން ސަޓާ އިން ވަނީ އިއްޔެ ކުރުނބާ މޯލްޑިވްސްގައި ހާއްސަ ރަސްމިއްޔާތެއް ބާއްވައި މަނިކަށް ލިބުނު އެވޯޑް ހަވާލުކޮށްފައެވެ. އެމްޔޫ މަނިކަކީ ރާއްޖެއަށް ފަތުރުވެރިކަން ތައާރަފްކޮށްދެއްވި ބާނީންގެ ތެރޭގައި ހިމެނޭ ފަރާތެކެވެ. 

މި ރަސްމިއްޔާތުގައި ވާހަކަ ދައްކަވަމުން އުމަރު މަނިކު ވިދާޅުވީ ސާޓާއިން އޭނާގެ ހިދުމަތުގެ އަގު ވަޒަންކޮށް އެވޯޑު ދިނުމުން އުފާކުރައްވާ ކަމަށެވެ. ޓޫރިޒަމް އިންޑަސްޓްރީއަށް 51 އަހަރު ފުރިފައިވާއިރު އިންޑަސްޓްރީ މިހާ ކުރިއަރާފައިވަނީ ވަރަށް ބުރަ މަސައްކަތުން ކަމަށާއި އޭނާގެ އުއްމީދަކީ ޓޫރިޒަމް ދާއިރާ ވީހާވެސް ބޮޑަށް ކުރިއަރައިގެން ދިއުން ކަމަށް ވިދާޅުވިއެވެ.

Advertisement

ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަށްގެންދިއުމުގައި އޭނާ ކުރައްވަމުން ގެންދަވާ މަސައްކަތުގެ އަގު ވަޒަންކޮށް ސާޓާއިން ވަނީ އެމްޔޫ މަނިކަށް ޝުކުރު އަދާކޮށްފައެވެ.

ސައުތު އޭޝިއަން ޓްރެވަލް އެވޯޑްސްއަކީ، ދެކުނު އޭޝިޔާ ސަރަހައްދުގައި ފަތުރުވެރިކަމުގެ ދާއިރާގެ ދޭ އެންމެ ޝަރަފުވެރި އެއް އެވޯޑެވެ. މިއަހަރުގެ އެވޯޑްގައި ރާއްޖޭގެ ޕްރޮޕަޓީތަކުން ވަނީ 31 އެވޯޑެއް ހާސިލްކޮށްފައެވެ. މީގެތެރޭގައި 14 ގޯލްޑް އެވޯޑާއި، 17 ސިލްވަރ އެވޯޑް ހިމެނެއެވެ. މިއީ ސާޓާ އެވޯޑް ބޭއްވި 7 ވަނަ އަހަރެވެ.